花旗股市前晚低收，睇幅圖短線個勢仲未散，但壞消息好多，氣氛又曳，睇落真係唔多盞。
嗰邊嘅markettalk轉咗，唔止講經濟差，仲講埋通脹，雖然聯儲局對「滯脹」呢兩個字好敏感，唔多敢提，不過搞邊瓣先都要有個選擇，𠵱家股民已經預咗佢下次會議最少減半厘息，仲開始講可能減3/4厘，按以往習慣，市場會迫聯儲局出手，最實際嘅做法就係插低花旗股市，如果又出呢招，道指12000關好快就會失守。
港股會唔會受影響？起碼氣氛上會偏淡啲。恒指已經第3日喺250日線樓下，10日線亦低過250日線，再唔升番上去，20日線下禮拜初亦會跌破250日線，咁個市就冇辦法唔試低位嘞。
上月期指結算日指數喺23600樓上，之後個市冇乜大變，同𠵱家嘅指數比相差好少，下禮拜四又係結算，如果要食大糊，大戶下禮拜一就係出手嘅時候，大家要睇實啲
正股破位睇20元
中鋁C輪7447：中鋁（2600）昨收15.08元，最高升過上15.72元，收市有近1巴仙升幅，算係好強嘅股份。睇技術走勢中鋁仲未升完，可以上試100日線，即係17.18元個位，破位就睇20元，可以諗下隻中鋁C輪7447。隻輪昨收56仙，有效槓桿率2.3倍，正股升上17同20元，7447應該喺73仙同1元樓上，正股跌穿13.60元止蝕。