李國寶辭去行政會議一職後，仍然有人咬住不放，勢估唔到呢位平時好受記者歡迎嘅大賓架竟然會突然間幾面受敵也。乜佢平時啲公關功夫失晒效咩？
知道若干消息嘅賓架W講：「大衞李平時同肥佬黎好老友，一出事就成為箭靶，冇得好講。」乜咁得人驚㗎，咁講法，肥佬黎咪生人勿近，要同佢保持距離至得？諗諗吓，打個電話畀知道更多消息嘅賓架P：「乜大衞李與占美黎好friend嘅咩？」賓架P答：「一場誤會啫，據我所知，大衞與占美唔熟，只不過大衞與馬田好好傾，馬田就同占美老友鬼鬼，於是根據毛主席以前嘅講法，朋友的朋友就是我的朋友，敵人的朋友就是我的敵人，一加一等於二，大衞仲唔係占美嘅老死？砌得占美就不妨砌埋大衞啦！」
原來邏輯推理可以如此簡單，令人失笑。賓架P話：「做占美老友，經常俾人砌，亦會一個不提防，俾《蘋果》砌埋，因為《蘋果》啲記者係又儍又天真嘅，駡人之前唔會請示占美，佢哋應該預先攞到指令，老細話砌邊個，先至好動筆駡人吖嘛。否則好容易傷害到老闆嘅朋友。」左丁山呢勻唔係失笑，而係大笑，因為賓架P夠晒黑色幽默，亦點出目前香港現時嘅荒謬滑稽劇情。
笑完一餐去鏞記吃飯，零舍好胃口，馬主N介紹高人俾左丁山認識，向左丁山指點迷津。高人話太多人嘅地方，不宜洩露玄機，最好另約時間作私人談話，左丁山當然冇問題。高人大大隻隻，精神飽滿，但原來唔多吃飯，夾餸菜入口之次數，起碼少馬主N與左丁山幾倍，可能另有功夫都未定。高人見左丁山猛咁食，勸喻應多吃清淡，多肉不宜，如有血壓高等病，有一簡單到你唔信之方法，可立即試吓，就係用紅衣花生（假設冇花生敏感症）浸白醋，先浸一樽，然後每晚睡前吃二至四粒，開始前先量血壓，記錄之，吃後可日日量血壓，可知道血壓何時會降低，降到140之後，就減吃一半，作保健用。高人指點，有益大眾，左丁山不敢獨享，寫出嚟俾大眾參考，相信無違高人濟世之旨。