獅子行同埋渣打銀行，都係政府授權嘅本地發鈔行，唔知係咪呢排坊間就渣打發鈔權，可能受到佢哋單一大股東淡馬錫增持股權至兩成，發鈔權危危乎嘅報道影響，搞到噚日滙豐銀行同亞洲欖球總會聯手公佈嘅「滙豐亞洲五國欖球賽」記招上，位司儀介紹主禮嘉賓獅子行「二班」滙豐亞太行政總裁霍嘉治出場時，都亂晒大龍，竟然講漏嘴噏咗半句「標準」（Standard），咁下半句「渣打」（Chartered）惟有夾硬吞番落肚。
坐喺台下嘅華華，俾司儀哥哥嚇一跳，以為噚日除咗Edison同程翔兩單猛料外，仲加多劑霍嘉治過檔渣打嘅頭條㖭。而身經百戰嘅Sandy哥(霍之英文名)，上台發言時，不忘幽默一番，多謝大家光臨同埋支持「HSBC」（滙豐）贊助嘅呢件體壇盛事，令台下賓客報以會心微笑。
幽默令嘉賓微笑
對於金管局擺明姿態，對有政府持股背景嘅發鈔行，如果持股上限去到兩成，就要撤回發鈔權嘅立場，霍嘉治就好識大體咁話，獅子行非常重視在港發鈔行地位，視之為滙豐對本地市場嘅承諾、企業推廣同埋市場定位嘅重要標記，又話如果金管局需要滙豐增發鈔票，佢好相信滙豐有能力隨時加印。
講番滙豐重新贊助嘅亞洲欖球賽，賽事會持續起碼三個禮拜，最少喺區內三個國家舉行，噚日記招就有嚟自四個國家同地區嘅欖球猛男出席，包括達陣次數最多嘅世界紀錄保持者日本隊嘅大畑大介（圖右二）。
電郵：mailto:[email protected]