今季英格蘭首個主要錦標聯賽盃，周日在溫布萊展開決賽，由來自倫敦的車路士和熱刺爭標。捧熱刺的Ringo，與撐車路士的Marco，在今集「讀者激鬥」環節中，拗到眉飛色舞；到底Ringo愛將貝碧托夫可射破施治十指關，還是Marco支持的車路士可以贏波捧起獎盃呢？
藍：藍鑽石 牛：牽牛 R：Ringo M：Marco
藍：你哋先禮後兵，邊個開始先呀？
牛：就Marco先啦！30秒即刻開始！
Marco：今場我貼車路士贏1:0，非常有信心；不過聯賽盃上半場大家都會謹慎應戰，和梗；再睇埋盤，介紹呢個2.05倍半場和，大家諗諗佢。
Ringo：我就唔認同Marco撐嘅車仔贏1:0。我自己心水係和波2:2，睇番今季熱刺喺各項盃賽全部有波入，連對曼聯同阿仙奴都唔例外；反觀車路士之前打歐聯試過3次和對手0:0，包括上仗對奧林比亞高斯。照咁睇車仔打盃賽唔係咁醒，但我都撐半場和！
牛：嘩，雙方開始發炮喇！
藍：Marco，你知道晒對方底細，點反擊呀？
M：Ringo，賭波齋睇歐聯數據，肯定唔掂啦，你要睇埋車仔呢排表現先喇。
R：唔係喎，我睇埋熱刺今季聯賽表現，佢哋得４場冇波入，所以好難信你個1:0噃。
車仔唔放聯賽盃在眼內
M：無可否認，熱刺近期守力係好咗，但剩係靠貝碧托夫同羅比堅尼，唔係咁易攻入車仔；以車仔呢排嘅防守力，不如我同你sidebet，熱刺入唔到車仔兩球啦！
R：唔止㗎，熱刺仲有艾朗連儂識入波；唔好唔記得車仔之前對哈特斯菲爾德都失波，嗰隊甲組仔咋。上季足總盃雙方打成3:3，熱刺都入到你3球。唔好唔記得，自從貝碧托夫宣佈留隊，成隊士氣大振；而且車路士話晒上季都攞過聯賽盃，今季最大目標，都係歐聯同足總盃。
M：上年個隊熱刺同今年個隊差好遠，今季嘅熱刺穩陣好多；就算貝碧托夫留隊，今場都註定傷心收場。
R：唔會，我深信貝碧托夫今場一定有波入。
牛：誰勝誰負，周日打過先知，不過藍鑽石，你覺得邊個講得好啲？
藍：兩個都喺friend，好難揀；初初Marco有紋有路，不過畀Ringo窒幾吓有啲留力喎，都係Ringo進取啲。
牛：咁我哋決定支持Ringo嘅貼士，熱刺法定時間內可以迫和車仔2:2，等加時再分高下。
牽牛心水推介
星期六3 伯明翰負阿仙奴1:2（7.5倍）
星期六42紐卡素負曼聯1:3（11倍）
星期日24車路士和熱刺1:1（6倍）
「拉闊女神」撐紅魔
大讚節目激鬥部份精采的紀儀，今次支持她的愛隊曼聯可以輕取紐卡素，不過就認同牽牛的貼士，認為曼聯會失波。
紀儀認為紐記攻力雖然疲弱，不過近期曼聯的後防頻頻出現誤會，周不時輸大意波；加上幾個後衞都鍾意助攻，畀咗唔少機會對手入楔。牽牛好同意紀儀呢一點，佢仲批評里奧費廸南不時玩高章，令紅魔後防更唔穩陣。
貼朗尼開「首球」
至於首名入球方面，紀儀嘅「紅魔情人」係泰維斯，不過上場對里昂已經入咗一粒，所以今次就估朗尼會肩負開齋呢個重任；紀儀更加冷靜分析，泰維斯近期助攻較多，所以唔估佢首名入球合情合理。呢位「拉闊女神」更加話：鍾意佢唔代表一定貼佢入波。
另一場伯明翰對阿仙奴，紀儀的貼士亦相當正路，估阿仙奴淨勝兩球，開個全民開心的「客勝」。
紀儀貼士
星期六3伯明翰負阿仙奴0:2（6倍）
星期六42紐卡素負曼聯1:3（11倍）
星期日24車路士和熱刺1:1（6倍）
踩牽牛撐車仔
一打入節目就同「奇拿」牽牛鬥嘴的Victor，先講一大輪近日掀起滿城風雨的「相片事件」，之後就挑戰牽牛的英聯盃貼士；Victor話呢場冇可能和波，車仔點計都可以贏波捧盃。
Victor指車仔比熱刺休息多兩日，體力本身已經佔很大優勢。再者，車仔領隊格蘭上任後戰績雖然唔錯，但始終需要一個獎盃去證明本身的領軍才能，以及平息周遭的質疑聲音。
紐記上力 僅敗合理
牽牛就話，驚唔驚車仔捧盃都唔益人，加時先贏波？Victor就補充，呢場波就算在中立場溫布萊上演，車仔在此球場出賽的經驗都比對手多，都算是一個利好因素；再比較兩軍陣容，車仔始終比較完整，連波歷克都開始復蘇，形勢上明顯佔優。
另外一場紐記主場對曼聯，Victor指出紐記開始上力，今次僅輸一球，相當合理。
Victor貼士
星期六3伯明翰負阿仙奴0:3（9.5倍）
星期六42紐卡素負曼聯0:1（5.5倍）
星期日24車路士勝熱刺2:1（8倍）
送你車仔衞衣
今集以webcam打入嘅讀者，除咗會由我哋幫你買3串7波膽，講得最好嘅讀者，更加會得到車路士衞衣；獎品咁豐富，仲唔即刻上網登記？
〈拉闊足球場〉下次舉行日期：28/02
想參加？即上
http://soccer.atnextcom/jp/soccer
節目重溫：
http://sport.appledaily.com
