提起風水佬，港人例牌想起姓蘇姓李姓楊，原來本地非廣東話人口淨係識一位大師。過年，CNN搵佢預測流年。羅馬尼亞起NewAge醫療中心，亦第一時間向佢請教風水──他是FengShuiLo。
「大師，我OffendtheYear點算？」「你4PillarsofDestiny好多FlowerofRomance，人緣旺鎮得住。」中為洋用，令風水在外國人眼中變得平易近人，也令FengShuiLo平步青雲──FengShuiLoisnotjustaFengShuiLo。所以話，學好英文、有國際視野，幾時都有用。
記者：劉嘉蕙
攝影：林栢鈞、王文忠
模特兒：Chloe（StarzPeople）
實景示範
FengShuiLo姓盧批侯賽因八字
何謂一個有國際視野嘅風水佬？去FengShuiLo辦公室望望，他的羅盤、風水尺中英對照、日常嗜好聽HeavyMetal、看西片，雜誌睇《Time》同《People》。「我經常去外國演講及教書，譬如去到俄羅斯，你總要知吓總統普京發生乜事，了解人哋國家主要地理位置，先可以指出黑海一帶位處西南面見水今年最旺。」
FengShuiLo原名RaymondLo（盧恒立），港大社會科學系畢業，中學迷上星座，後來研究八字及風水，90年代開始在英文報章撰寫專欄，現時風水書出到希臘、波蘭版，寫得贏外國風水學家，也憑這點國際視野，「外國都有人寫風水，但只懂理論唔識實踐，我開始寫專欄之時，正值伊拉克局勢緊張，我批吓侯賽因八字、又寫吓當時大家最鍾意嘅戴安娜王妃、李小龍，讀者就有興趣睇。
「好多英文風水書音譯詞語，我用意譯，好似《藏經》就叫BookforBurial，外國人易明得多，𠵱家好多用語都係我作。」不過Raymond話佢唔係淨幫外國人睇風水，香港人幫襯都無任歡迎。
美金變歐元
近年全球中國熱，東方色彩物事紛紛被西方人捧上神枱，Raymond坦言大有帶挈，「以前去外國睇風水計美金，𠵱家計歐元！」他的風水班，採五天全日制課程，學生千里迢迢搭飛機來上堂，場開場滿，「客人主要有兩種，最多建築師一類專業人士，學風水增值，亦有許多單親媽媽學來搵食。」單親媽媽？「西方人早婚早生仔多，離婚率又高，睇風水時間自由方便湊仔，而且女性天生傾向關心鄰里，較易掌握風水。反而一些較重實際的亞洲國家，如新加坡，就會較多男人學。」Raymond說學風水要有批判思考，他講學生分佈也講得像社會分析。
風水學說放諸四海皆準，但到外國講學，Raymond會根據文化差異，在內容上略作權宜，「如我想講流年社會會多同性戀，喺香港可以，但去美國要小心，因台下可能有好多同性戀者，覺得你咁講冒犯到佢。到回教國家就唔可以提算命兩個字，要用環境設計呢個Term。」
上邊較大者為中英對照羅庚，用阿拉伯數字、方位及金木水火土都有英文注譯，下為傳統羅庚。
屋主Deseree：
想學埋一份
「屋企有請開人睇風水，但Raymond講風水着重講解原理，非常簡潔易明，令我明白不同方位點解好同唔好，學到好多嘢，聽完之後真係心思思想跟佢上堂！」
俄羅斯籍學生Mila：
明辨正負能量
「我04年跟Raymond上堂，學晒《易經》、八字、風水，可以考嘅Certs都考晒！返到屋企，我都會擺銅錢、換窗簾顏色，法籍老公都冇反對！外國都有好多人研究風水，風水係教人分辨環境裏面正負Energy，再加以利用，係一門有趣學問。」
RaymondRaymond我有嘢問
1.星座同風水，邊樣較值得參考？
星座分析性格幾準，但預測運程較弱，因為星座分析淨係計太陽系，太陽系只係宇宙一小部份；而九大恒星入面，對人類影響最大嘅地球被排除在星座命盤之外，所以分析會出現局限。八字講陰陽，陰陽係整個宇宙大規律，所以應用性較廣。好似龍鳳胎，睇星座唔會有分別，但八字就會講到男女有別。
2.南北半球睇風水有冇分別？生喺南北半球係咪唔同計法？
冇分別，八字係睇日曆，唔係計季節，全地球只會有一個日曆。而風水係計方位，全地球亦只有一個南極，所以羅庚去到南北半球，都只會指向同一個南！不過因應國家地理環境，可以加入微調，例如去新加坡，會計多啲火，去到日本，水就會重啲。
網址： http://www.raymond-lo.com
基本收費每呎一歐元；八字千五