【泰國直擊】唔少圈中人信奉嘅泰國白龍王，喺噚日農曆正月十五日，喺佢位於泰國芭堤雅嘅白龍王廟舉行每年一度嘅大型祈福消災儀式，到場嘅圈中人有舒淇、任賢齊（小齊）、苗僑偉夫婦、導演劉偉強、林建岳父子、王晶同晶女郎孟瑤等。富商劉鑾雄（大劉）同愛將甘比亦都身在泰國，仲約埋小齊同舒淇一齊嘆魚翅㖭。
香港時間噚日朝早七點鐘，眾星齊齊遵照規矩，身穿全白裝束、赤腳現身廟宇，同近3,000名善信迫埋一堆，但一般善信只獲白龍王例牌派發嘅親筆簽名一蚊美金紙幣，但大多圈中人就有白龍王加料送贈嘅獨特祈福儀式，不過白龍王今年冇玩滴蠟同含香燭，改玩含香煙。
贈水晶手鏈
白龍王為舒淇祈福時，就摸摸佢個頭，送贈碌柚同幾條水晶手鏈，笑到見牙唔見眼嘅舒淇仲即時戴上；輪到小齊時，白龍王先用箱頭筆喺小齊頭上凌空畫符，又用手指篤佢眉心，跟住點着一支香煙，及將點着嘅煙掉轉放入口，透過濾嘴將煙霧噴向小齊塊面，再摸吓佢頭頂，又送佢碌柚同一條金鏈，表現勁開心嘅小齊即雙手合十兼舉V字手勢。
其後白龍王休息咗一陣，至去廟內神壇繼續祈福，跪拜嘅舒淇、小齊同戚美珍先後被白龍王以朱砂印喺頭頂蓋印，再俾白龍王扯頭髮，將成個人扯起身，至中午眾星坐車去曼谷嘅「傑魚翅」開餐，原來大劉同甘比已經開定枱，飯後小齊仲坐埋大劉順風車離開。
