拍拖、結婚以及生小孩，對於一個普通人來說，是一個普通不過的人生階段。但是對於謝安琪（Kay）來說，結婚生仔卻引來抨擊，此時她終於明白到娛樂圈的遊戲規則，她已預料到有一成人會談論她的音樂，其餘九成人只會講及她的私人生活，其中還包括她的體重。 採訪：李珮洳
過去
拍拖箍牙屢犯禁
謝安琪由入行開始就一路犯下歌手不應犯的禁忌，首先她入行不久以工作悠閒為理由便去箍牙，接着又與張繼聰（Louis）傳出緋聞，在事業剛有起色時宣佈未婚懷孕，還大着肚與Louis結婚，並誕下張瞻，休息半年就全面復工。有很多唱片公司不准旗下藝人拍拖，就算拍拖都不可以高調，阿Kay從來沒有理會這些規則，加上她之前所屬的只是一間小型的唱片公司，從來行事只有她與經理人兩個人。
當人人以最fit最靚的姿態示人，阿Kay就偏偏走去箍牙，她說：「我真係覺得冇問題喎，一開始我就唔係要用靚女形象示人，咁加上當時又冇乜嘢做，我又想箍靚棚牙，於是咪去箍囉，公司又冇鬧我。」阿Kay一入行深信有好音樂便令大家認識她，可惜她令大眾開始對她有些少認識，是因為與張繼聰的緋聞，她說：「我都知我嘅fans分兩種，一種就係由我喺商場唱歌就嚟捧我場嗰班，另一班就係睇完我結婚生仔呢啲八卦新聞，之後再聽我嘅歌。」
為八卦Fans出精選
阿Kay記得於懷孕期間在街上聽到別人談論自己，她笑說：「有次喺街聽到啲人話，呢個咪係邊個囉，佢唱歌㗎嘛，𠵱家走去生仔呀！」這件事之後阿Kay發覺香港人留意一個歌手的花邊新聞多於音樂，所以唱片公司就針對這班「八卦」的歌迷，為阿Kay推出一隻精選碟，她說：「公司知道有一班人之前唔識我，佢哋真係因為我結婚生仔先知我係邊個，於是咪趁機會出隻精選碟吸納多一班歌迷。」
現在
躋身一線覺太快
阿Kay初入行加入了一間小規模的唱片公司，之後她的唱歌事業開始有起色，順利地加入了現時的唱片公司新藝寶，正當大家覺得她在大唱片公司的支持下，事業應該大有作為的時候，她宣佈懷孕並要休息半年多。
詛咒要幾衰有幾衰
這個消息傳出後，很多人對阿Kay議論紛紛，她表示其間聽到不少難聽的說話，就連網民都抨擊她，她說：「真心講我從來冇嬲過，我結婚生仔係我嘅事，我真係冇諗到會成為大家討論嘅話題，可能我係一個歌手，大家識得我先去談論我。至於有啲網民講嘅說話要幾衰有幾衰，有啲仲係詛咒嘅說話，我只係唔明佢哋點解要咁閃縮喺網上鬧人呢？我只會諗呢啲人可能好細個，佢哋冇考慮過呢啲說話對人哋嘅傷害有幾大！」
怕上位快唔識處理
對於休息半年再度復工，阿Kay總算可以承接之前的氣勢，在叱咤樂壇頒獎典禮上，她更首奪女歌手銅獎，她坦言有想過自己有機會得獎，她說：「自從出邊有傳聞話我入到三甲，我先至開始諗可能有機會得獎，我都覺得自己入行條路總算OK順利，我都冇諗到咁快有大公司簽，但係我知道我得獎都係成team人嘅努力。」
問到阿Kay會否有信心在一兩年內奪取更高的女歌手獎項，她即耍手擰頭說：「我真係唔會咁諗，我心目中祖兒同阿詩先至有實力得呢個獎，我年資太淺啦，我暫時都係努力做好唱片先。」阿Kay指自己入行未夠3年，有目前的成績已是預料之外，故她沒有想過要躋身一線女歌手的行列，她續說：「所有嘢好似嚟得太快，太快嘅話我會唔識處理。」
未來
家庭工作要分清
對於音樂阿Kay有一定的堅持，她希望大家細心看清楚每句歌詞，好好思考當中的問題，她表示比起3年前所得的名利多了，但她最想要的是有人談論她的音樂，她又說：「我唔係話懶清高，初初出碟好多人會講我啲歌嘅內容，呢種滿足感係好大，𠵱家大家都會講我屋企人，我都知道冇得返轉頭，以後講關於我嘅音樂可能得一成人，其他都係講八卦新聞，咁我咪惟有做好啲，起碼令呢一成人唔好走埋去關心我嘅私事。」
拒絕當纖體生招牌
阿Kay於暫別音樂會上曾經講過，希望做一個默默做音樂、不用做訪問及其他工作的歌手，雖然這是沒可能變成事實，幸好她至今在工作上的自由度很大，經理人沒有迫她做不適合她的工作，她說：「你估我生完冇纖體公司搵我咩，如果你見到我着住泳衣張大海報喺隧道口，你都驚啦！仲點會買我隻碟呀？況且我覺得自己都唔係肥得好緊要，大家唔好再咁留意我體重啦，聽番我啲歌好過啦！」
最後阿Kay希望日後將兒子、丈夫盡量同工作分開，她想大家將注意力放在其工作上，最重要的是她不想兒子被灌輸一個錯誤觀念，她解釋：「我唔想成日講起個仔，係因為我好怕佢大咗識嘢時，見到自己個名同張相喺報紙雜誌度出現，我好驚咁會令佢覺得自己同其他小朋友唔同，又唔想佢認為自己比其他人叻，歌手都係一個普通人，我做歌手都係一份職業，所以我都成日叫身邊嘅歌手朋友唔好寵壞佢，唔好令佢自細就覺得自己與別不同，以後我都會盡量減少提起囝囝，雖然我知道唔係一件易事。」
攝影：陳慧安
化妝：KamenLeung
髮型：Derrick（Chin.G）
服裝提供：MonaliseMarquee
