馮德倫同莫文蔚喺舊年12月先宣佈8年情玩完，但相隔兩個月，近日馮德倫竟然搵番莫文蔚拍戲，仲撮合佢同吳彥祖做一對，展開一段剪髮情緣。睇嚟呢對過氣戀人再見亦是朋友，感情依然唔錯。
近年立心行導演路嘅馮德倫，呢排有新搞作，近日佢忙緊拍一條15分鐘嘅電影短片《天使》，仲親自請莫文蔚同吳彥祖做男、女主角，短片會下月7號喺上海舉行嘅一個電影活動中播放，到時現場播完後，兩位主角會即時上台，緊接演出一段約10分鐘嘅迷你音樂劇，利用電影crossover音樂劇，大玩時空穿梭。
短片內容以60年代做背景，飾演理髮師嘅吳彥祖邂逅顧客莫文蔚，上演一段浪漫愛情故事，吳彥祖仲會由後生演到中年，為咗增添成熟感覺，佢嘅中年造型仲會黐鬚，效果都幾有型，而莫文蔚噚日試造型，今日先正式開工。
莫文蔚又唱又跳
馮德倫話佢搵莫文蔚演出，主要係角色需要唱懷舊爵士歌曲，又要識跳舞，所以莫文蔚係最適合人選，馮德倫仲話：「雖然大家唔再係情侶，但我哋喺工作上合作過好多次，好有默契，況且佢係專業演員，大家做嘢唔會有任何尷尬。」既然關係咁好，復合都唔係冇可能啩？馮德倫話：「感情問題已經講過晒，唔會再講，總之𠵱家只係工作上嘅關係啦。」
