肥姐沈殿霞生前相識滿天下，她的離世，圈中人深感難過。身處美國大西洋城登台的汪明荃，昨日接受商台電話訪問，表示最後一次跟肥姐見面是去年出席一個朋友於澳門舉行的生日派對，對於二人被傳不和，阿姐說：「我哋唔會爭，觀眾鍾意邊個就邊個，肥姐不嬲都係大家姐，佢講完之後唔會有人講，認識咗40年，我哋都有食飯聚會。40年嚟啲人都拎呢啲嚟講，好唔公道。」阿姐透露曾與羅家英探望肥姐，講自己抗癌經過，大讚肥姐專業、有義氣，她說：「佢好照顧同事，會幫人出頭爭取。」問會否出席肥姐追思會，她說：「應該唔會，我三月一日離開，飛去北京開會。」
林蛟：好尊敬老人家
林蛟：「我睇住佢大，佢拍戲一唔明，我就教佢。佢好尊敬老人家，好有禮貌，我啲徒弟鄧光榮、狄龍同我搞生日，佢都會嚟玩。佢六十幾歲人就離開，好可惜。其實有病就應該要戒口，唔戒口唔得啦，佢有肝病就唔應該飲酒，可能工作問題啦，之前佢喺醫院出嚟，我探過佢一次，後來喺電視台又見過佢，3月2日追思會我會去嘅，見到欣宜先同佢講，佢好乖呀，減肥減到咁靚，唱歌跳舞都好有天份。」
薛家燕：失落到喊唔出
「我喺美國登台期間知道肥姐過身，失落到喊唔出，上飛機後回想起同佢嘅一點一滴，就喊咗出嚟。我當年復出，肥姐都有鼓勵我要堅強啲，叫我唔好諗太多，最重要係養大仔女。肥姐病後我都有同佢通過幾次電話，佢都有透露過唔放心欣宜，我起初都擔心欣宜，不過噚日見到佢成熟咗好多。希望大家愛錫肥姐之時，亦要愛錫欣宜，唔好畀太大壓力佢。」
曾志偉：我喊咗兩日
曾志偉：「我喊咗兩日，我唔會去加拿大出席肥姐喪禮，留喺香港幫手搞3月2號個追思會，肥姐過身嗰晚我同欣宜通過電話，欣宜好堅強，聽到話網民都對欣宜改觀，咁咪好囉！欣宜處理得好好，希望大家都可以好似肥姐一樣支持欣宜。」