我有幾個身為VolkswagenFans嘅朋友，一得閒就問我嗰部開篷車Eos幾時嚟香港，又問開咗篷之後部車靚唔靚，好似好興奮好期待咁。查實今日開始，喺佢哋位於銅鑼灣告士打道嘅Showroom已經有得睇，大可親身摸親身試。
講番部車，Eos線條真係好流線，尤其閂咗篷後就更加突出。若想享受一下開篷駕駛樂嘅話，只要㩒一㩒前座中央手枕旁嘅控制鍵，就可以將連天窗嘅電動硬摺頂開啓，需時仲只係25秒左右。另外，部車所用嘅2.0公升FSI引擎，喺Turbo裝置嘅輔助下，最大馬力有成200匹，加埋轉波速度快過手波嘅6前速DSG半自動波箱，咁你唔使擔心佢嘅性能表現啦！至於車價方面，聽聞係40萬左右，相比起先前大家預測接近45萬嘅價錢低些少。如你想睇吓部車嘅真身，不妨抽時間落Showroom啦！
記者：鄭達基