我由細到大嘅DreamCar，唔係馬力大到嚇死人嘅超級跑車，又或者係車價隨時貴過間屋嘅豪華房車，反而係簡單到震嘅LandRoverDefender110！無錯，就算嚟到今日呢部新版型號，個Look同以前無咩分別，線條仲係硬繃繃，但我就係鍾意佢呢個咁硬朗嘅Look，好多差人同軍官都坐佢出巡，加埋力大無窮嘅2.4公升柴油Turbo引擎，符合晒EuroIV環保規格，好力得嚟又環保！
記者：鄭達基
攝影：楊錦文
模特兒：Vicky（TheGroup）
入彎記得車慢軚快
今日，我終於得償所願，可以一嚐駕駛新一代LandRoverDefender110StationWagon嘅滋味，順便仲可以扮回歸前嘅阿Sir咁去行咇成個人即刻威武晒，真係諗起都興奮。
點知，喺我哼緊「憑傲氣，硬漢子……」嗰陣發生一件好瘀嘅事；話說喺駛離Showroom無耐要轉左，嗰剎那我以為自己揸緊嘅係私家車，加上Defender屬慢軚嘅關係，搞到轉第一個彎唔夠位「拗」而失敗，仲要行前倒後3次先轉到彎，真係瘀到爆。同行代理朋友提醒我，話Defender入彎車速一定要慢，但自己回軚就一定要快；後來緊記教誨，就算去到石澳道呢類多彎嘅路段，都可以好輕鬆咁入彎出彎。
Turbo偈重低扭輸出
揸住新版Defender110StationWagon跑東廊，諗住踩快些少，先醒起佢嘅馬力得90kW，唔似私家車有咁大馬力；直到經過陡斜嘅連城道，終於發覺呢台引擎嘅好處。由於配備嘅2.4公升柴油Turbo引擎屬全新設計，加上着重喺低轉時嘅扭力輸出，所以特別將輸出數值調校至360Nm/2,000rpm；雖然用2波嚟起步都OK，但最緊要係攀爬斜路嗰陣韌力夠，一直以較高嘅波段衝上斜都完全無氣咳，而且佢仲符合EuroIV環保條例。另外，喺6前速手波波棍旁邊，就係四驅模式選擇桿，只要揀啱模式，就算條路幾爛幾難行都無問題。
外表硬朗認真Man
我一直覺得Defender推出咗咁耐，喺外形設計上可謂十年如一日，但好多Fans反而因為咁而鍾意佢；事關硬繃繃嘅車身線條，襯埋車頭超大鬼面罩同埋雙圓頭燈，仲有四輪16吋超大合金軨，搞到成部車觀感真係Man到爆。可惜嘅係，由於佢要以商用車名義出牌，而被迫將尾窗封上，你試諗吓如果無封嘅話係咪型好多呢？
至於車廂，如果你諗住入面會有好齊、豪華到極嘅裝飾的話，咁就真係Sorry啦；因為Defender係部講求原始感同駕駛樂趣嘅四驅車，所以車上一切以簡單實用為主；全車座椅以絲絨鑲嵌外，車窗更只有前排屬電動操作，後排都仍然係手動式，乘客要用手慢慢絞。不過始終最實際嘅音響同冷氣佢都有齊，後排椅背後方仲有鐵網，用嚟分隔座艙同行李艙㖭！
新車速蘋
囗
．傳統到極嘅方匣子造型，完全凸顯咗佢嘅剛強一面。
．2.4柴油Turbo偈最緊要好力，但最正都係可以慳油錢。
囗
．由於要以商用車名義出牌，所以被迫封尾窗。
．要行車時好似置身豪華房車一樣舒服？我諗你揀錯啦！
供款幫你計
首期：$39,000
利率：4.75%
年期：48期
每月供款：約$8,702
註：以上數據由代理提供，僅供讀者參考
LandRoverDefender110StationWagon規格
引擎：2,401c.c.直4柴油Turbo
馬力：90kW/3,500rpm
扭力：360Nm/2,000rpm
傳動：6前速手波，四輪驅動
車重：2,041kg
車輛提供：LandRoverHK（27132383）