少男殺手江若琳（Elanne）出道以來走純情玉女路線，努力避談與樂壇同期新人小肥、陳柏宇和關楚耀的緋聞。諸多顧忌，原來她早已心有所屬。昨日是元宵佳節，Elanne在中國情人節前夕亮相《蘋果》網站直播節目《娛樂開CHAT》，跟網友們猜燈謎和大爆為何會愛上夢中情人羅志祥（小豬）。當讀者大逼供追問她希望把螢幕初吻獻給誰時，Elanne終表示要跟小豬咀嘴。Elanne更定下人生目標，揚言要挑戰快歌。節目完結前，約20名歌迷更親到影廠撐場，令她既驚喜又感動。大家可登入《蘋果》網站 http://ent.appledaily.com隨時重溫節目。
採訪：林惠卿、懷鈺 攝影：葉君海
淫照可怕望快平息 Max
Max：對於近期嘅「閃卡」（疑似藝人淫照）風波有乜嘢睇法？
Elanne：我睇完之後覺得發相嗰位朋友真係好恐怖，咁樣去傷害啲藝人，我覺得真係唔係一件好好嘅事，所以我都希望呢件事可以盡快平息，繼續咁樣落去，係會對好多人造成好多傷害。
Max：你覺得邊首歌最能代表自己的心聲？
Elanne：其實我最鍾意係唱《儍豬》，因為我覺得呢首歌好能夠表達我同fans之間的關係，我就係「儍儍似隻豬，原來有好處，隨時隨地有事，優先被關注」每次例如我病咗，fans都好關心同緊張我，知道我病就即刻煲湯畀我飲。
想同小豬唱歌跳舞 將軍澳奸人
奸人：你話自己最想同小豬（羅志祥）合作，如果真係有機會，你會揀同佢唱歌定係拍戲？
Elanne：我想同佢唱歌、跳舞，我鍾意小豬係因為佢跳舞好叻，佢唱歌都好好聽。我睇過佢一個演唱會，見到佢彈琴、打鼓、跳舞、唱歌，覺得佢好才華，所以都好想試吓喺唱歌跳舞方面同佢合作。
奸人：幾時會有跳舞歌？
Elanne：其實都快，𠵱家公司都幫我安排緊，都揀緊歌，如果一揀到就會開始排舞，預計7月就會有快歌出。
議論初吻嬌嗔忸怩 屯門Sky
Sky：你嘅螢幕初吻最想送畀邊個？
Elanne：吓？呢個問題咁難答嘅，真係考起我㖭。
主持：不如畀少爺占啦！
Elanne：我哋拍完部戲啦，完全冇親熱戲，螢幕初吻，當然想畀自己嘅偶像，可能嚟緊會接到好啲嘅劇本，可能會接到多啲戲，所以都唔知。
主持：如果有得畀你揀，你會揀邊個？
Elanne：哎呀，唔知啊！
主持：小豬呢？
Elanne：好啊！
出騷最驚甩嘴走音 紅磡牙傑
牙傑：你做嘢對自己有乜嘢要求？
Elanne：其實我07年裏面都係一個對自己要求好高嘅人，但我覺得呢個唔係一件好事，就好似一條繃緊咗嘅橡筋咁，成日都放鬆唔到自己，可能我唔想令到公司失望，所以每次出騷前我都好緊張。每次都會同自己講，唔可以甩嘴、唔可以走音，一定要做到最好，每次都會畀自己好大壓力。拍戲都係，好想每一部都比上一部戲更加進步，雖然好辛苦，但呢個都係我嘅目標。
娛樂開CHAT：JJ今晚同你Chat
各位娛樂版擁躉，有興趣和你的偶像傾談嗎？《娛樂開CHAT》第六集將請來賈曉晨（JJ）擔任嘉賓，於今天（22日）6:00pm跟網友談天說地，若想一睹JJ的風采，請準時登入 http://ent.appledaily.com即可，節目於當晚7:00pm在《蘋果》網站直播。
若你被選中在節目中發言，可獲精美禮物包一份；當中獲本報評選為最精采問題的讀者，更可獲得JJ親自挑選的神秘禮物。千萬不要錯過！
