素有「大笨象」之稱的滙控（005），一向予人感覺係長線投資「無死」，只會「有買貴、無買錯」的股份。不過，近年滙控股價跑輸大市甚多，撇除收取股息，以該股昨日收市價114.60元而言，除非有人係5年前買貨並持有至今，否則若然係近兩三年才買，照計應該有唔少人輸錢。
買滙控都要輸錢？的確幾令人唔太舒服，由於「大笨象」歷年被市場賦予的形象令人有太多夢想，當一個夢被市場戳破，霎時間好難接受到現實，這種心情不難理解。星俠不怕坦白講，在下對滙控從來冇乜好感，事關以其股價而言，一般散戶買一手其實都算「重皮」，加上股價又升得慢，根本上普通人炒滙控幾難發到達！
有中長線投資價值
不過，高盛忽然趁滙控即將派「成績表」前出報告，剔出其「亞洲區確信沽售名單」，但維持「沽售」評級，的確幾令人狐疑，究竟係叫人買貨，抑或勸人繼續掟之哉呢？星俠反而諗，滙控現價已跌得幾殘，此際高盛又出份咁嘅報告，或係滙控「衰到貼地」之時，好可能無得再衰。
如果散戶從未買過滙控，家陣見價殘有心吸納作中長線投資，應該可以考慮。
當然，等「大笨象」派業績、睇清楚究竟次按對該股有多大影響之後才買，一樣得。今篇文章目的係提醒股友們，係時候望多兩眼隻「大笨象」。