《東宮西宮》舞台劇以對白密不透風聞名，變成漫畫，黎達達榮將件事情推向另一個極端──同名新漫畫書前後二百幾頁，一句有字的對白都沒有，煲呔唐唐陳太葉劉即見即打，蟻民走難、一個香港淪陷。
看完，我好驚，呢個人咁憤世呀？
記者：劉嘉蕙
攝影：梁細權
浮腫葉劉
「葉劉好難畫，對眼浮腫得嚟又有雙眼皮。」
死魚眼煲呔
「畫煲呔要強調半死魚眼，加勁深法令紋。畫亞洲人的眼有難度，眼線不畫得太死，不然會不似真人，所以你見到個個都冇下眼線，以眼袋交代眼部輪廓。」
永遠的四萬
「陳太比想像中難畫得似，因為沒有明顯特徵，同埋佢一唔笑就唔似，所以在書中由頭笑到尾。」
認住呢撇鬚
「高官之中曾俊華最易畫！我畫得佢咁好，叫佢快啲退稅俾我。」
德成從不驚恐
「下巴位揣摩咗好耐，另外我本漫畫要畫佢驚恐，但搵咗好耐都冇佢驚恐樣。」
矇豬眼肥佬
「矇豬眼肥佬！（忽然恍然大悟）係喎，你哋友好喎……」
煲呔陳太混戰Keroro
故事由一顆墜落地球的隕石開始，小石子不偏不倚落在正義女神天秤的右邊，天秤歪了。之後，煲呔曾元神出竅，自我複製成哥斯拉，彈指間砸碎立法會大樓、一個彎腰瓦解中環。說時遲，陳太加入，伸手撩起萬千蟻民，兜口兜面掟煲呔！
以為Get到意思，知你想講法治精神崩壞、行政凌駕立法、陳太以民意追擊煲呔吓哇？睇睇吓又見到小布殊黃金甲麥當勞叔叔和Keroro。借政治的話講，黎達達榮的《東宮西宮》，有三不一沒有：政治不正確、不分黨、不合邏輯、沒有對白。
黎達達榮很坦白，「從來少理政治，日常都係畫畫打機。」他說自己面對政治的心態，一如普通香港市民，「唔可以話冷感，但確實好難投入，譬如西九，好像比較關我事，但看宣傳，來來去去都是大型表演項目，開口埋口拓展商機，反映政府對藝術的認識很落後。」抽起條筋想畫政治漫畫，因為進念，「跟進念班底是朋友，有時也參與創作，聽聽吓，都忍唔住覺得政府真係幾白癡。去年做《東宮西宮5》，一口氣畫了百多個高官大頭，畫到好有心得，不過個劇一完，功夫無所用。」
冇邏輯就是邏輯
他以黐孖筋系列起家，畫畫12年，不愛重複自己，由科幻到青春到運動題材，幾乎乜都畫過，「我個心一直想畫一個由頭打到尾的漫畫，但苦無機緣，總不能叫陌生人甲乙丙沒來由打百多頁。不過換了政治人物做頭，整件事就很不同，所有事自自然然MakeSense了。」所以《東宮西宮》漫畫不是話劇的副產品，而對比一般政治漫畫的剔透玲瓏脈絡分明，黎達達榮徹頭徹尾天馬行空，避走議題、不分黨派，自稱「勁躁狂、政治不正確」，「冇邏輯就係本漫畫的邏輯，我鍾意打邊個就邊個。」
但背後有計算，天真唔晒，「畫政治漫畫總要有點承擔，安排人物不分黨派由頭打到尾，其實亦算是我部份政治觀，簡單講就係一班人有破壞冇建設。」有政治人物做頭，讀者可自動補白劇情，他連對白都慳番，「反正政客開親口都冇好嘢，句句都為補鑊！」
法國響朵表面風光？
他更帶着此新繪《東宮西宮》漫畫參加上月法國Angouleme2008國際漫畫書展，封面一輛100%MadeInHK的雪糕車就這樣成功換來外國人對香港怪獸政治漫畫的反應。由是，我進一步以為黎達達榮好好景，同輩本地獨立漫畫家中，他知名度高，合作單位多，黃耀明何韻詩楊千嬅都有找他畫插圖；向黃玉郎致敬的前作《龍虎門徒》近日在法國出版，此行法國書展便跑了6天做小簽名會。
那天訪問，不知是環境昏暗，還是飯氣攻心，他忽然感懷身世。
「一年做一本漫畫，當一本分得4萬蚊，點夠撐1年？」
你是很多後輩精神偶像，「調轉佢哋係我精神偶像！你說我多人識，實情是，現在個個漫畫家都有固定地盤，得我冇，畫了咁多年，好似都冇乜焦點。」
講去法國經歷，他合作地想了幾個，「那邊的人很喜歡漫畫、有漫畫百貨公司、政府很支持藝術、參展人可免費搭的士。」得咁多？「機場有賣橙味汽水。」「……法國人着衫好靚……第3次去……」
a.法國Angouleme漫畫節現場，黎達達榮努力簽名。
b.簽名會，與熱情法國人對答，問乜呢？「問我喺香港紅唔紅……」點答呢。
c.與藍精靈合照。
d.向黃玉郎致敬的舊作《龍虎門徒》，被歐洲出版巨擘Casterman睇中，剛出了法文版《龍虎門徒》，成首個被歐洲大型出版社所揀選的香港漫畫家。書本印刷精美，左揭㗎！
e.上星期看邁克專欄，說黎還未坐穩就興奮地讓我看手機一張路邊拍攝的電影海報，原來就係呢張，《愛斯大力士參加奧運》。
f.物主鄭重要求刊登此照，「想睇吓登報紙係點樣。」
冇乜嘢未實驗過
他說自己快40，畫漫畫12年，近年步入惆悵期。年輕時提起理想就雀躍，中年就很難興奮起來了。「在這裏久了，就發現原來甚麼都有人做過，都係一本書，都係人腦諗出嚟。仲有乜嘢未實驗過呢？」
想放棄？「應該說所有前景都想過了。」轉畫主流漫畫？「做獨立漫畫不是特別偉大，甚麼人就做甚麼事，像我這種性格，其實畫唔到商業嘢。我唔係大家樂。」唔畫畫做甚麼？「文員啩。」「我打字手勢幾正宗。」
近年最深刻一次旅行，不是去法國解釋《龍虎門徒》，是前年到日本參加音樂節，「在香港，你老了，朋友又老了，大家終日𠵱𠵱哦哦；在日本得我一個，居然可以跟後生仔一齊Un，那一刻我很驚訝自己仍然後生得起。」
「但返到香港，照舊厭尖腥悶。每日問自己，你以後想點呢？」
後記
點呢？
我帶着《東宮西宮》找黎達達榮，預期講香港危機，結果得出一個中年危機。
稿寫至此，正路我應該下一個概括式感性結論，呼籲受訪者加油再上路，或者扮老積講吓「人生就是點點點」之類Cliche語，又天真又儍又虛偽那種。
但細黎達達榮一個圈的我辦不到。點呢？可以點呢？最後會點呢？
黎達達榮小檔
1971年生，自小愛漫畫，自編自畫後影印給同學傳閱，至今出版漫畫近20本。
1995 《慢慢豬‧凸凸交》
1997 《木積積‧中中值》、《笑笑雞‧磨磨沙》、《彈彈蝦‧高高甩》
1998 《得得意‧恐恐怖》、《動物園台灣出巡》
1999 《青春耳鼻喉》、《魔笛》
2000 《咆哮脂肪》、《毒雞湯》
2001 《港島線》
2002 《青蛙腸胃炎》、《耀眼花生》、《青春耳鼻喉（二）》
2004 《男女關係》
2005 《龍虎門徒》
2007 《籃球像你》
黎達達榮《東宮西宮》雪糕車法國（Angouleme2008）書展DumDum轉！
日期：2月23日（5:00pm）
地點：油麻地Kubrick
查詢：23848929
網站： http://www.tattatwing.com
