今年係北京奧運年，適逢又係台灣總統大選年，兩岸大事成為國際焦點。有內地收藏家趁機推出以大陸同台灣18個士兵為主題、名為《戰地寫生：新十八羅漢像》共18幅油畫，希望賣到好價。
負責拍賣嘅蘇富比話，呢18幅巨型油畫出自內地油畫大師劉小東之手，18個畫中人，一半係內地士兵，一半係台灣士兵，寓意兩岸是兄弟，有和平相處意思，估計成交價高達4,500萬元至5,500萬元。呢18幅巨型油畫，幅幅都有成個人咁高，不過捨得花幾千萬元買畫者，實有地方收藏。拍賣會4月9日喺會展舉行。呢批作品政治十分正確，有人話成交價隨時過億元。