中環快拍:地監局陳佩珊貼街招

中環快拍:地監局陳佩珊貼街招

近年地產代理監管局班高層興玩親民,間中就去巡視各區地產代理,噚日地監局行政總裁陳佩珊(左)去咗北角一轉,除例牌問候同提點、派發傳單呀咁,仲玩貼街招…呀,應該係貼海報先啱,咪就係近排政府賣晒公仔箱廣告,有關防止洗黑錢活動嘅宣傳海報囉,陳總裁更重點提示,建議班代理一定要貼喺分行入面最當眼處,等員工同顧客都時刻警惕咁話。亞洲地產老闆蔡志忠(右)即時將呢張摺到縐晒嘅海報,貼咗喺公司招牌隔籬,認真識做。
黎樹雄攝