唔經唔覺，今日就係正月十五元宵佳節，農曆新年話咁快就過咗！年三十行花巿買咗盆四季桔，𠵱家都唔知點算好，丟咗佢又有好似好嘥咁。同公司花王傾開偈，佢話唔使愁，四季桔最啱醃製鹹柑桔，加溫水或蜜糖飲可解渴。
花王話，製法好簡單，剪咗啲柑桔，唔要枝葉，再用熱水冲亁淨啲桔，跟住用猛火蒸五、六分鐘，再放入玻璃樽入面醃。不過，醃柑桔都有技巧，首先喺玻璃瓶底鋪一層粗鹽，先好放一層柑桔，再加一層鹽冚住。就係咁一層柑桔，一層鹽到裝滿整瓶後密封，放喺陰凉嘅地方醃製至少半年。
花王又話，一啲桃花、菊花、年桔葉都可以用嚟做亁花，紮成一束放喺衣櫃辟味。呢排咁亁燥，放埋一堆自然風亁就用得嘞。
香港中醫師公會會長關之義話，飲鹹柑桔水係有除痰潤肺、清熱下氣嘅效果，特別係對醫喉嚨痛、燥熱等病症有效，「但本身體虛或者有風寒，就唔好飲咁多嘞。」
逢周一至周四刊出