沈殿霞一生對儀容十分講究，其曲髮更成為她的標記，肥肥生前的專用髮型師和化妝師周玉華（華姐）及陳文輝，前晚在亞視節目中暢談肥肥生前事迹，華姐憶述有次到訪肥肥家，看見做完化療的肥肥手腳損爛，令她十分心痛。
亞視前晚播出紀念肥肥沈殿霞的特備節目《肥姐永遠懷念您》，60年代開始便替肥肥梳頭及化妝的周玉華和陳文輝都有亮相，兩人道出肥肥生前的點點滴滴，心底裏卻有說不完的話。
甘為愛女捱苦
華姐盛讚肥肥為人重情重義，每當她有事，肥肥定必仗義相助，她說：「佢唔係淨係對我，對任何人都好好，連我屋企仔女有病，佢都好關心，問我需唔需要錢。有次見到佢，真係好肉赤，佢啲手又爛、腳又爛、口又流晒血，肥肥同我講，話如果唔係為個女，唔會付出呢個代價（化療），我真係覺得佢好辛苦。」華姐提到最後一次見肥肥是去年的事，她說：「最後一次見佢喺澳門嗰次，幫佢梳完頭去澳門，佢返咗嚟我冇機會探佢，醫院又唔方便探佢啦，不過我成日都有打電話問佢啲消息。」
至於輝哥就最欣賞肥肥率真及不記仇的個性，他說：「大家了解佢係性情中人，有時佢唔開心，譬如同事間嘅誤會，但佢只係嬲一陣，之後唔會摷番呢啲嘢嚟講，呢個係佢嘅獨特性格。」輝哥又稱雖然他是肥肥的專用化妝師，但很少替她化妝，他說：「佢啲皮膚好靚，根本唔使化妝。同埋佢嘅開心果形象唔係裝出嚟，係發自內心嘅。」
無綫和亞視前晚分別製作特備節目悼念肥姐沈殿霞，兩台收視均告上升，其中無綫前晚7點半播出的《東張西望─永恒的開心果肥姐》及9時半播出的《肥姐我們永遠懷念您》，平均收視同為29點（約182萬觀眾），前者最高達30點（約188萬觀眾），後者最高則達31點（約195萬觀眾）。另外，無綫於昨日凌晨播映的《肥肥開心影視情懷四十年》平均8點（約50萬觀眾）收視，較平日多出約20萬觀眾。
213萬觀眾同悼
至於亞視前晚7點半播放《永遠懷念開心果：肥肥繽紛三十年》平均收視6點（約37萬觀眾），最高達7點（約44萬觀眾），9時半播放的《肥姐．永遠懷念你》平均和最高收視均為5點（約31萬觀眾）。無綫和亞視前晚9時半合共有超過213萬香港觀眾同時一起悼念肥姐。撰文：林妃
