肥姐沈殿霞前日上午因病逝世，終年62歲。肥姐縱橫演藝圈數十載，相識遍天下，肥姐的離世，遠在美加的圈中友好如顧嘉煇和雷安娜等也深感哀痛。而與肥姐相識接近40載的阿姐汪明荃，雖然身在加拿大登台身體不適，但仍透過助手說：「好難過，唔單止冇咗個好朋友、好拍檔，仲係娛樂圈好大損失。」
沈殿霞於1974年與汪明荃、張德蘭和王愛明組成四朵金花，於《歡樂今宵》內表演歌舞，肥姐和阿姐數十年來合作無間，被視為無綫鎮台之寶。前日肥姐病逝，身在多倫多登台的阿姐也接獲消息，記者昨日凌晨時分致電阿姐時，她透過助手Monita說：「Liza姐（汪明荃）話𠵱家喺多倫多準備做騷，呢幾日感冒，聲帶好唔舒服，所以透過我回覆傳媒，佢話已經知道肥姐嘅事，好難過，唔單止冇咗個好朋友、好拍檔，仲係娛樂圈好大損失。佢向欣宜慰問，希望佢節哀順變。Liza姐話佢聲帶唔係好好，希望大家見諒。」
黯然神傷
羅家英哽咽不能成言
至於與阿姐同樣身在多倫多登台的羅家英，昨日接受電台訪問時提到好友肥姐過身一事時，表示前日早上已收到消息，又謂最後一次見肥姐是在其家中，他說：「都成三、四個月前，我同Liza去佢屋企探佢，傾咗一段時間。」他表示非常欣賞肥姐的專業及演出，又提到得知消息後，他與阿姐都相當黯然。
羅家英說：「大家個心都戚吓戚吓，其實佢哋幾十年朋友，雖然雜誌成日話佢哋唔啱，其實唔係㗎，做朋友一定有爭拗，冇話順晒，會喺問題上有討論，佢哋係互相尊重同賞識。」說到此處，家英哥也忍不住哽咽，一時不能成言，最後他表示很擔心欣宜，又說：「希望秋仔可以分啲時間畀佢，安慰吓佢。」
另一方面，肥姐昔日的溫哥華鄰居如顧嘉煇、岳華、雷安娜、仙杜拉、李婉華、張翼和黃植森等，也對肥姐的去世深感哀痛。顧嘉煇昨日接受本報特約記者電話訪問時說：「接到消息好突然，知道佢病情好嚴重，但諗唔到佢走得咁快。喺溫哥華嘅時候，佢喜歡同我太太打麻雀，喺我印象中肥肥係個真性情嘅人，工作態度一流，冇得彈。」仙杜拉則在電話中說：「失去咗好好嘅朋友，佢嘅離世係娛樂界無可彌補嘅損失，佢嘅開心形象冇人可以代替。」
而肥姐的好友岳華說：「肥姐患病期間我哋仍然經常通電話，有時一齊打牌，但肥姐說話係比較辛苦，上個月佢媽媽去世時，大家盡量唔想將消息話畀肥姐知，今次肥姐離世對佢家人打擊最大，希望大家除咗懷念開心果之外，應該畀佢屋企人更大支持。」
持枴排練
「以最美一面娛樂觀眾」
移居溫哥華多年的李婉華，昨日也在其加拿大電台節目中，邀請張翼、雷安娜和黃植森等一起悼念肥姐。李婉華說：「我同肥姐都係溫哥華一分子，希望為佢做啲嘢，所以請咗佢幾位好友喺節目度一同悼念肥姐。」
雷安娜說：「2000年同肥姐喺《麗花皇宮》同台演出，肥姐工作好認真，為求唱得更好，肥姐好似總司令咁叫我哋返自己屋企練歌。喺2003年再做《麗花皇宮》時，肥姐要揸住枴杖排練，但演出時佢都堅持要着高踭鞋，以最美嘅一面娛樂觀眾。」
張翼表示肥姐喜歡熱鬧，每次請食飯都點很多名貴菜式，他說：「好多時都食唔晒，我好欣賞肥姐守時、孝順。佢自己都煮得一手好菜，亦訓練到幾個菲傭都煮得好菜式。欣宜短短一個多月裏面失去兩個至親（母親與外婆），希望欣宜能夠撐得住。」
採訪、攝影：陳怡（溫哥華）、戴彩煥（香港）
娛樂資料庫：兩烈女互撞噴火
同為四朵金花成員的沈殿霞及汪明荃，數十年好姊妹理應感情要好，可惜兩人性格同樣剛烈，經常發生磨擦，最為人知是2000年無綫台慶夜，有傳由於阿姐主演的劇集《雷霆第一關》未能提名女主角獎，心情惡劣的阿姐在綵排期間不滿肥姐企正中間位，肥姐全聽在耳裏。數日後兩人合作《歡樂今宵》，對稿時又因各持己見不歡而散，雖然其後兩人曾牽手闢謠，但都被指是面和心不和。
05年演出《歡樂滿東華》時，更傳出肥姐和阿姐在拜神活動中爭燒肉吃，連出場次序及排位都爭。去年肥姐坐輪椅出場領取台慶萬千光輝演藝大獎時，阿姐親自上台獻花，二人終冰釋前嫌。
小八卦：故居擺陣化災
肥肥生前居住的劍橋花園寓所，昨日被發現在窗口位置擺放了一個金色類似金屬的物體，堪輿學家區仲德昨在電話中說：「任何人過咗身，喺七七四十九日都有機會回魂，靈魂會返嚟屋企，都會感受到屋企嘅磁場。如果放一啲金色物體鎮守喺屋企嘅唔吉利位置，可以有助化解災氣，如果金色物體係金屬就更加理想。」
