美國商品大王羅杰斯一向係中國fans，間唔中就會唱好中國股市，不過，佢對內地樓市嘅睇法有啲唔同，早兩日就喺新加坡嘅投資會議上，大大聲話中國樓市將會出現調整，甚至預言今年內地地產市場嘅投機客，會有人破產收場。
其實羅杰斯都唔係第一次踩內地樓市，早喺舊年9月，北京一壇投資講座入面，佢已經狂踩上海樓市有泡沫，建議大家投資二三線中小城市嘅房地產，都唔好揀上海，甚至大刺刺咁話：「我唔會到上海買樓！」擺到明同上海幫唔妥。
上次批中 再次預言
結果，上海樓市真係一鑊粥咁「杰」，甚至好似萬科呢類級數嘅地產商，都要變相減價賣樓，今年上海個樓市仍然唔多睇好。其實上海樓市唔多掂已經醞釀咗好耐，羅杰斯極其量只不過係咁啱講中，不過，起碼佢真係夠膽講出嚟，仲要係企喺中國人地頭（北京）度講，冇啲把握都企唔住腳。
所以，今次佢擺明車馬預言有人會破產，真係要擔定凳仔等睇戲。