昨日公佈的中國1月份CPI一如所料係7.1%，既然早已有「消息人士」放風講咗呢個數，實際數字都好難同預期差得遠，內地A股昨日表現強勁，好耐無見過上海A股升逾百點，成交回增至1000億元以上，成交回升呢個訊號，反映股民入市信心增加，唔可以睇少。
港股同A股同樣氣氛顯著「回暖」，細價股更罕有地全線急升。睇圖表，不少細價股在去年3月狂潮過後，調整近一年，不但跌晒舊年嘅升幅，有啲直頭係跌凸。以去年4月轉型能源及資源股嘅世城（355）為例，去年3月底由0.111元起步，個多星期炒高4倍至0.465元，之後跌足10個月，一度變回仙股，昨升上0.121元，都係去番起步位。
第一視頻仲有水位
去年3月左右正值股市火紅時期，不但證券行同銀行出現散戶爭機㩒事件，出股票機嘅舖頭都大排長龍，當時高位接細價股火棒者大有人在，由於散戶最興坐艇唔肯沽，大戶要收番齊啲貨，用一年時間算係差不多。
揀二三線股炒，第一樣要睇嘅係成交異動股，突然成交大增，成本唔輕，要炒上去嘅動力都會較大，近日例子有中國礦業（340），出現成交異動之後，3個交易日累升咗成倍。噚日嘅成交異動股之一係第一視頻（082），單日有242球貨易手，係歷來最大單日成交。此股由去年高位4.83元跌落1元，跌幅近八成，要升番原位，就要升番4.8倍，博反彈番上去50日線1.48元，仲有唔錯水位。
中國風電有勢要追
舊年啲股仔最流行係轉型資源股，另一類流行嘅，係環保概念股，當中又以清潔能源股最為吃香，但係炒過一輪之後，有關股份就靜晒落嚟，假如再炒二三線，呢類股份應該仲有得諗，尤其係雪災暴露內地缺電缺煤情況嚴重，當煤價又貴又缺之時，風力發電嘅成本效益便大大提高，中國風電（182）有勢要追，航科通信（1185）亦不妨追落後。