Outlander換偈加音響<br>洗滌身心　小四驅

Outlander換偈加音響
洗滌身心　小四驅

三菱去年底引入嘅Outlander七人SUV大賣，為咗精益求精，代理喺今個月再加推新版小改款Outlander；坦白講，外形上大致相若，改得最多嘅並唔係肉眼可見，而係要用身心先至感受得到嘅性能同享受，一部小型四驅，為大家駕出一個清新暢快之旅。

記者：梁美甜
攝影：陳盛臣
模特兒：Sandy

加大50匹靜靜飆

上一款Outlander副偈採用INVECSIII，3公升版小改款用嘅係升級版INVECSII，馬力亦由之前嘅170匹提升至220匹，足足增強咗50匹，真係唔講得笑。單係馬力提升並唔意外，最喜出望外嘅反而係整個駕駛過程，一踩油門已經好明顯感受得到部車「好想去」，加上Outlander喺直路上跑得平穩、內櫳又夠靜，完全唔覺部車原來已經飆上近100km/h。
天窗雖非大如天幕，但配合多個大窗整體視覺又出奇地開揚，沿海駕駛，陣陣海風吹埋嚟，認真舒爽！美中不足係喺市區行走諗住唔用四驅模式，點知一轉用2WD模式，部車有啲搶，揸起嚟要稍微揸實軚盤。

用身感受

■馬力輸出加大咗兼有埋四輪驅動，小改版並非得個樣。

a. 升級到3.0V6引擎，加埋MIVEC技術即令馬力增至220匹。

b. 軚盤路面感十足，就算係女仔都好有信心揸得掂。

c. 由中控到駕駛席都予人闊落空間感。

d. 簡單不過嘅錶板陳設，中間仲有顯示行車資料嘅屏幕。

e. 想轉2WD或四驅模式，擰吓個旋鈕就搞掂。

■前座唔只係常見嘅仿桶形設計，最正係連電控調校都有埋。

■中排空間算闊落，兼且各自有頭枕㖭！

■後排座椅同舊款一樣單薄，暫坐一會都OK嘅。

■合金胎軨尺碼提升18吋。

靚音響聽《思憶季節》

性能馬力提升之外，新款音響系統亦值得一讚，一套名牌音響RockfordFosgate，喺尾排旁加配多個AMP，初初開機未適應，重低音猛烈擊撞車內空氣，連個心都不受控跟住狂跳，稍為調節到適合自己後便完全兩回事；我本身唔鍾意轟住喇叭嚟揸車，但都忍唔住要試播張學友首《思憶季節》，開住音響聽住歌行車，加埋陣陣海風同柔和陽光，呢轉車短短十幾分鐘，已經係一個洗滌心靈之旅，呢啲先叫真正享受。

用心感受