肥姐生前相識滿天下，在圈中地位德高望重，故今次離世實令人感哀傷，不少圈中人懷着悲痛心情悼念這位開心果。
梁思浩：吻別心難過
「嗰次同肥姐食飯，我臨走之前同佢講，可唔可以錫你一啖先走，嗰一刻個感覺好似即將要同佢道別咁，感覺好難受，好難受。佢隻手一路都唔放，嗰吓真係好唔捨得。」
學友：會盡力幫忙
「我啱啱喺澳洲做完身體檢查返嚟，知道肥姐走咗，我未打畀欣宜，但聯絡咗陳太，知道佢哋好忙，有乜要幫手我都會盡力。」
潘廸華：長輩式友情
「我同佢細個已識，當時佢爸爸唔畀佢出夜街，所以佢就成日搵我過橋，因為佢父母都好鍾意我同信我，我就會去佢屋企帶佢出嚟玩，我哋嘅友情係長輩式同好深厚，佢帶畀大家好多歡樂。」
羅霖：成個人呆咗
「我同肥姐喺亞視時候合作過，又一齊去過大西洋城登台，肥姐係一位好好嘅長輩，我嗰時選完亞姐出嚟，有機會同肥姐一齊主持節目，佢教咗我好多嘢。聽到佢病逝我成個人呆咗，個心好唔舒服。」
何守信：我No.1拍檔
「佢係我No.1拍檔，我最後一次見佢係大半年前，當時佢對自己好有信心，但係後來惡化，最近同佢都冇聯絡，佢成日同人講做人要開心，而佢都係開心面對，佢份人好直，好有生命力。」
呂方：坐大髀覺重
「有次做大騷，我唱歌肥姐伴舞，之後坐落我大髀度，當時覺得有少少重。佢畀我印象好開心好珍惜人，雖然我哋唔係成日接觸，佢對我好好。喺悼念節目度大家都好感觸，我都睇到眼濕濕。」
范姜：盼欣宜堅強
「肥姐走咗真係好難過，我之前感冒喉痛咗成個月，都覺得好辛苦，所以肥姐好叻。因為阿B嘅關係，我同肥姐一齊去過拉斯維加斯登台，當時我仲大住個肚，肥姐好照顧我，希望欣宜堅強啲。」
劉心悠：加國一面緣
「我以前住溫哥華時喺一間CD店做sales，有次欣宜同肥姐入咗嚟，嗰次係我同佢哋近距離見面，雖然冇對話，但我印象中肥姐係大家好熟識嘅長輩，佢離開係好可惜，我知佢fight咗好耐。」