范姜、王敏德馬詩慧夫婦、羅霖同司馬燕前晚都拖兒帶女，齊齊去紅磡渡輪碼頭欣賞「星躍馬術奇藝坊」，白韻琴同男友謝偉俊都有去捧場。帶埋囡囡嚟睇馬術嘅范姜話：「本來阿B（鍾鎮濤）都嚟，不過佢去咗日本同啲band夾歌，跟住又去美國登台，佢太忙喇，忙到成個新年我都只係見過佢一次。」
司馬燕囝囝怕馬
馮仁昭問范姜點解唔跟埋去玩吓？佢話：「佢去10日，會去5個地方，咁辛苦唔去囉。」講開馬術，佢話𠵱家個女3歲半，佢想等到個女4歲，就帶佢去學騎馬。
至於一家大細嚟欣賞嘅司馬燕都話：「我都想教個仔騎馬，不過兩個仔都好鬼驚馬嘅。」馬詩慧同老公王敏德都帶埋仔女去睇，馬詩慧話好少一家人嚟睇馬戲，又自爆情人節同老公去咗食飯撐枱腳慶祝㖭。