以心建家嘅郭氏家門內鬥，兄弟意見相左，相比起嚟，起碼賭王二房4姊妹就融洽得多，何家大小姐超瓊噚日出席一個財經論壇時，分享做管治嘅心得，仲暗示多得細個時何媽媽管教嚴厲，佢今日先可以做到女賭王。
澳門何家大小姐超瓊自從以個人名義同美高梅金殿孖住搞賭場後，就多咗個女賭王封號，佢話做領袖、學管治呢家嘢，細個時就喺屋企俾何媽媽訓練。
因為媽咪制訂一套問責制管理模式，佢係大家姐（喺賭王二房嚟計），要孭重飛睇住細佬妹，兇得嚟又要令細嘅信服，有爭拗時仲要做和事佬，呢個可以話係佢做領袖嘅啓蒙時期，佢話，呢個成長環境對佢後嚟喺企業度做管治好有用。
知人善用 自小訓練
據佢講，何媽媽要佢做最大嘅睇住班細佬妹，不論學校成績或者規矩做得唔好，作為大家姐亦要捱鬧。超瓊好有承擔咁話，呢啲係大家姐嘅責任同義務。不過，佢話唔會一味兇細佬妹，而係摸熟各人性格，軟硬兼施。佢解釋，「管人要令人信服，互相信任，如果唔係一定反（抗）你。」所以佢話做大嘅都要不時自我檢討。
將呢啲細蚊仔嘢，用喺公司管治上work唔work？睇超瓊喺信德集團（242）越嚟越受賭王重用（家陣係董事總經理），自己又做埋女賭王，就知有幾掂啦。佢曾經同傳媒講過，話超鳳管理財務，而超蕸份人就文靜啲，唔多說話，但最可靠，最啱做地產管理……呢個家姐果然識用人。
最錫超儀 張羅戰衣
至於佢最錫嘅應該係細妹超儀，當年超儀要入娛樂圈，大家姐就幫手向父母求情，前年超儀要出戰威尼斯影展角逐影后，四出搵名牌贊助戰衣，全靠大家姐幫佢張羅，難怪超儀話大家姐係佢偶像。
搞美高梅金殿顯骨氣
何超瓊除咗講家教，仲講番搞美高梅金殿時嘅辛酸，呢位大家姐第一次擺脫賭王老竇，自己同過江龍合作搞賭場，可以話係放低身段，因為佢唔係齋坐喺房，而係好認真落手落腳做。
話說美高梅金殿籌備之初，好多嘢都由超瓊負責，好似向政府有關單位申請乜申請物，又要同銀行交涉等，而呢啲嘢，大家姐其實都未做過，但既然係自己嘢，亦唔想將老竇公司嘅資源公器私用，惟有自己四圍跑，瞎子摸象咁摸番嚟。佢好樂天咁話：「本嚟做開企業管治，變咗落手落腳做番前線嘅嘢，真係創業咁，幾得意，亦引發咗唔少新思維。」
咁澳門嘅前景係咪真係咁好呢？佢就畀一串數字出嚟，話澳門喺03年沙士及之後每年嘅人口增長有幾多，重點唔係數字，而係大家姐嘅記性，華華見佢喺台上完全冇望貓紙，就吐出一串數字，記憶力認真強，而呢個亦係做領袖嘅資質之一，唔係點記得下屬有乜專長。
電郵：mailto:[email protected]
