港股噚日跌咗超過500點，但金礦股喺金價上升支持下逆市造好，之前入咗紫金礦業（2899）坐艇嘅北角阿Ben打嚟問好唔好趁反彈走貨。
沈：沈振盈 玲：楊慧玲
Ben：想問吓隻紫金，我自己都坐咗艇，之前睇好佢係資源股，10.2蚊入咗，但係𠵱家巿況唔好，趁佢反彈，喺入貨價平手走？定係跟沈大師今日喺蘋果專欄咁講12蚊走？
沈：紫金係隻比較複雜嘅股，巿況同金價都會影響到佢，有時佢跟巿走，有時又跟金價走。不過我發現佢1月開始唔太跟金價走，金價升時股價冇乜點郁，但到2月佢又跟番金價走，就算個市調整，股價都冇乜點跌。3月係黃金季結，好多基金都揸咗好多金，對冲通脹同經濟衰退嘅風險，金價有機會喺第一季再爆頂，所以你會見紫金一跌到10蚊好快就反彈。你可以再揸一陣，未來整體金價都係升，加埋估計股巿到3月都唔會大插，你可以揸貨等佢再升少少，會唔會見12蚊就要睇吓夠唔夠力，不過到11.5蚊你都有一成賺，可以考慮走咗先。
Ben：會唔會賺少咗呀？
沈：個市咁波動，真係唔好介意話賺得少咗，就算真係賺少咗，將來總有機會再買到平貨。
玲：其實我自己噚日都有買紫金，不過今日走咗啦，大師你覺得我可唔可以入番再走多轉？
沈：其實紫金抗跌力比較強，你可以趁金價升再博多轉，博佢升到11.5蚊賺返10%。
建設銀行（939）
五蚊邊入炒波幅
關公：今日推介隻建設銀行（939），六行中我最睇好呢隻，但係唔建議𠵱家買，佢短期都唔會升穿6蚊，𠵱家買冇咩水位賺。等個價跌到5.3至5.4蚊就可以入嚟短炒，就算股價再跌，長揸都唔怕。
沈：如果佢跌穿5蚊一定要先走貨，寧願等股價再低啲先再入過，如果係即日鮮，可以喺5蚊至6蚊之間炒吓波幅。其實六行之中，反而好多投資者都鍾意招商銀行（3968）。
玲：係呀，招行最近發咗盈喜，話盈利會升一倍！
關：但係佢都有危機，就算個巿連升4、5日佢都升唔起，點都升唔穿30蚊。
沈：建行都一樣，點升都升唔到6蚊，只係大家水位唔同。揀建行嚟短炒，5.2至5.3蚊入，到6蚊就走，喺2月仲可以咁做，3月就唔知喇。
--大埔關公建議--
建議買入價：5.4元 目標價：6.2元
止蝕價：5元 時期：-
中石油（857）
短炒一轉
陳小姐：我想買中石油（857），𠵱家仲未買，應該幾錢買？
沈：中石油近排走勢每逢喺11蚊都有反彈，之前油價升嗰陣對股價都冇太大刺激，反而一路向下走，股價由20蚊跌到10蚊先企穩。呢隻股曾經跌穿10蚊，短期有反彈條件，可以喺11.5蚊樓下入，始終佢嘅巿盈率唔高，預期會成為亞洲最賺錢嘅公司，都係對佢有利。
玲：巿況波動，𠵱家未係最好嘅入巿時機，你可以等個巿定啲，大約11蚊先買。佢未來一兩個月會投資過千萬喺西氣東輸項目，可以等埋佢3月出業績，舊年油價咁高，中石油今年盈利一定創新高，點都可以冲喜吓！
沈：佢問題在於有太多衍生工具，所以股價一反彈到某啲位就有阻力，但係短線都可以炒吓，可以喺11.5蚊買，12至13蚊走，定10蚊止蝕。
中國銀行（3988）
次按影響細
楊小姐：我想睇吓中國銀行（3988），佢噚日話次按撥備對業績影響唔大，其實買唔買得過？
沈：話次按對佢影響唔大，搞到人人對佢都有憧憬！但唔同報紙對𠵱番說話有唔同演繹，佢噚日係話所有CDO（債務抵押債券）已經全數沽售，唔會大幅影響2007年嘅盈利。但事實上CDO只係佔2億至6億美元，反而最重要嘅係ABS（資產抵押證券），估計中行投資超過500億港元喺ABS度。佢2007年盈利可能仲有增長，但係2008年有機會因為次按撥備而倒退。
楊：咁3.1蚊買唔買得過？
沈：長線就唔好啦，短炒就無妨，可以定3蚊止蝕，到3.3蚊至3.4蚊就走，都只係用1毫博2、3毫。如果業績跌，有機會跌穿招股價，一穿就好危險。
--將軍澳楊小姐建議--
建議買入價：3.1元 目標價：3.5元
止蝕價：- 時期：一個月