內地電器巨頭國美電器（493）主席黃光裕似乎又再發功，過去一個月已十幾次回購國美股份，好可能係為另一次收購行動做準備，今次對象係邊個呢，內地傳媒《南方都市報》報道，話係山東家電連鎖企業三聯商社。
內地上市嘅三聯商社，喺山東有過百間門市，佔濟南家電市場約七成。話說喺情人節嗰日，呢間企業嘅股權被司法拍賣（拍賣原因又係另一個古仔），當日有一間叫龍脊島嘅神秘企業，用近5.4億銀人民幣高價投得，當時大家就估幕後老細係邊個，咁啱國美黃光裕係咁回購股份，似係想買嘢，自然「嫌疑」最大。
同得主有接觸
《南方都市報》話，前日國美總裁陳曉好曖昧咁話，「國美沒有參與當日股權競拍，但目前和三聯商社股權拍賣得主有接觸。」
過咗冇幾耐，就有傳國美正係三聯商社嘅最終買家。
咁迂迴收購嘅手法，可以話係黃光裕嘅慣用伎倆，佢舊年底收購大中嘅時候，都係用呢招。今次借第三者出手競投，內地傳媒估可能國美電器喺香港上市，參加競投內地上市公司股權嘅審批程序會耐啲，所以要搵捷徑。