美國黑馬奧巴馬初選氣勢如虹，好有機會做民主黨總統候選人，他日如果面對共和黨麥肯，四十六歲對七十歲，變成世代（年齡）之爭，種族（黑白）之爭；鷹鴿（攻伊、反戰）之爭，美國好耐冇試過有如此黑白分明之總統選舉，勢必哄動。鬼佬R素來支持共和黨，最近亦講奧巴馬成為美國第一位黑人總統嘅機會好大，並講出一個美國互聯網政治笑話，就係奧巴馬明年一月宣誓就職之日，在就職演詞中就會講及「白宮」作為總統府邸及辦公地方，實屬政治不正確，要將WhiteHouse改名為BlackHouse，但如果奧巴馬離開後，另一位白人總統接任，咁又如何？鬼佬R話：「以後就叫做BlackandWhiteHouse算嘞。」黑白溝埋好似係灰，不如叫做GreyHouse啦，可以凸顯政治上並非事事黑白分明，而係灰色地帶佔多數！
講到政治灰色地帶，鬼佬R話最近期例子就係有一個啤酒業聯盟反對減啤酒稅或撤銷啤酒稅。係人做生意都唔鍾意交稅，點解啤酒業者會反對減稅咁奇怪呢？據講，酒能亂性，啤酒業者話唔想減稅太急，影響社會喎。呢啲說話出自唔飲酒嘅社會工作者之口，我哋就會相信社工發自真心，但出自啤酒生意人之口，未免牽強。鬼佬R話：「我有經營外國啤酒入口，以前從價付稅40%，去年唐司長減到20%，仍然覺得太高，站在啤酒入口商角度，非常贊成取消啤酒稅。但係啤酒製造商就唔係咁諗，佢哋啲廠房已經搬去大陸，生產成本低廉，運酒嚟香港賣，酒稅對佢地影響唔大，反對取消酒稅，純粹係出自本身利益，與甚麼社會風氣全無關係。」
講講吓，變咗講算術題與稅率題。跨國公司合法避稅，自古已然，非今日發明。例如在香港設立一間貿易公司，向菲律賓訂購農產品，直接運去美國銷售。以低價向菲律賓買入，以高價賣畀美國分銷商，令到菲律賓供商應，美國零售商都無利潤可賺，由香港公司賺晒差價，但因屬離岸交易，呢類離岸利潤唔使交稅。當然啦，三地公司均屬同一集團。鬼佬R話，呢類新瓶舊酒不時以現代版本出現，不能單看表面言辭喎。