內地嘅地產發展商閒閒哋都有一千幾百間，為咗吸引買家，打響名堂最要緊。喺廣州有最多樓盤嘅恒大地產做推廣真有一手，農曆年前已經喺電視大賣廣告，華華聽聞，恒大喺香港將有新一輪推廣。
恒大今日會喺多份香港報章登樓盤廣告，連十幾版全版樓盤廣告。粗略計算，如果要喺全港主要報紙登齊十幾版廣告，點都要一千幾百萬先搞得掂，恒大認真落本。
大灑金錢為上市
冇辦法嘅，內房股不斷受宏調影響，大部份股價近期都喺低位上落，喺嚟緊上市嘅新股裏面，仲有大把內房股排緊隊。而恒大正係爭取緊做鼠年第一隻喺香港上市嘅內房新股，集資過百億元，打算下周一先做「媽屐停」，為咗突出品牌，吸引基金大戶同散戶留意，大灑金錢賣廣告在所難免。
據了解，恒大喺廣州有多個樓盤，做做吓變得比較全國性，𠵱家喺全國22個城市有40幾個樓盤，土地儲備有4600萬平方米。咁講法，都追得上有超過5000萬平方米土儲嘅碧桂園（2007），唔知上市時會唔會好似碧桂園咁受投資者歡迎呢？