有樣學樣當然世風日下，近日學懂乜叫做Desensitization。目擊公司女同事由本來收到一張相We嘩大叫，去到後來開成個PhotoAlbum，評頭品足，面不改容。原來人就係咁容易「去敏感化」。
離譜之事只要一直做落去，咬爛消化繼而吸收埋只係遲早問題。明晒，唔怪之得香港人越來越腌尖腥悶，一放假就話要去旅行散心，話要洗滌心靈。不過，想淨化肉身遠離煩囂，需要的其實是緣份、同一個城市驛站。
攝影：陳盛臣
http://appleblogpaper.blogspot.com
aboutme:
thekidult
咁就08。啋。
身體機能開始衰敗，圍內朋友勁多人結婚生仔，錢開始越來越少，個天越來越灰，啲妹妹仔越來越Kai。世界就嚟無彎轉，惟有買多啲嘢討自己歡心，延長自己心理壽命。
驛站茶室
對茶向來一竅不通，通常只限陪阿爸阿媽飲茶食點心的星期六日。不過，無人可以怪我，因為身為我呢種末代殖民地人，就算唔媚外都有點崇洋，看荷李活動畫片向來死都唔揀粵語配音版，正宗蒲點就只有蘇豪同蘭桂坊，如果俾人見到你去諾士佛臺蒲，你玩完了。所以，真係需要點緣份，如果唔係真係會同「水泠泠」擦身而過，當然亦要順道多謝星期日下晝放我飛機的朋友甲乙丙丁（我畀多次機會你哋，下次再犯就開你班人全朵）。
推門進內，挑了一張窗邊的桌子便坐下，托着頭望着般含道上往來的行人。走在外面的人，跟平時一樣多，但入耳的不是城市聲音，而是館內小魚池的流水聲，再加上淡淡的茶香，外面的生活都給隔離了，感覺非常奇妙，就像一個城市的驛站，俾你停一停，重新聚焦，然後再上路。
茶館主人叫陸秀娟，對中國文化一直懷着濃厚興趣，早年教學生寫作，後來從商，又後來決定跑到半山開設茶館，同好此道者相聚一刻，飲多一口茶。
在香港，有心人，幸好從來不缺。
「你飲開咩㗎？」無所謂，你介紹吖。「普洱啦，呢啲係95年百年大葉普洱，我親自幫你泡。煲水先。」
罕有黃茶全港獨家
陸小姐係外省人，由細到大，幾乎無飲過一滴水，屋企長輩長期會泡一大壺茶供應全家需要。鍾意茶，都係因為自己喜歡中文，並發覺幾千年來茶的文化又跟許多詩詞歌賦都有着密切關係。「其實我飲茶都可以好隨便，茶包我都飲。其實成個茶嘅文化源遠流長，講求和諧，慢慢你會發現個世界其實唔係咁大，我𠵱家追求係一種境界，一種由茶延伸出來嘅氛圍，多過一種感官享受。」而館名水泠泠，原來來自唐朝詩人白居易的詩作：「坐酌泠泠水，看煎瑟瑟塵。無由持一碗，寄與愛茶人。」
唔明唔緊要，最緊要唔好讀錯個名。個音唔係「冷冷」而係「零零」，OK？
茶主要分六大類，以茶湯顏色分，包括綠茶、黃茶、白茶、青茶、黑茶同紅茶，其中又以發酵過程最費時的黃茶最為罕有，一般十年以上的古董茶餅大約賣一二千蚊，但係隨便一餅君山銀針黃茶就已經索價三千。我問陸小姐有無賣黃茶，答案係有，但係因為售價貴，乏人問津，所以入貨非常少，不過如果想在茶館試試這款連四五歲小朋友都飲過翻尋味的貴價茶葉，你還是要到這店一行，因為香港只有這兒有貨。
「飲茶。」飲茶，陸小姐。「嗯。點呀？可以嘛？」
「啊，好飲呀，好飲呀。我……我覺得好飲過茶樓嗰啲好多。好似滑啲。」
「嗯，係㗎，茶樓嗰啲普洱經過特別焙火處理，飲起上嚟太熟，太陳。你留意吓，清淡得嚟，個喉頭有一種好甘嘅餘韻……」
店員要考試
這間店，甚麼都是古董來的。如象棋、牆上的對聯、家具，案頭的擺設，還有一個個抹上一層層茶油的陳年紫砂壺。這已是一種文化。
「你知道嗎，由於我在店裏面的時間有限，所以我的店員便需要有豐富的知識。她們每人都要通過一份考試，才可以正式在這裏工作。她們都喜歡喝茶，我想她們都喜歡在這樣環境裏工作。」陸小姐說，每一手茶都可以有不同的口感。我想，那當然。要獲得那份喉頭上的滿足，得視乎心情，視乎步伐，視乎身體的狀態，視乎氛圍。
這裏一手茶最少要六十蚊，好貴呀呵。
不過，呢六十蚊令我領會到多一門藝術嘅機會，而且仲俾我搵到MyCupofTea，我覺得幾抵吖。況且，比起好多成世淨係識去茶樓「嘆茶」的人來說，我覺得自己這一刻非常幸福。
水泠泠（31051595）
薄扶林般含道65號天悅閣地下B舖
最新回應
少女盧宛茵：細個有跟阿爺去陸羽，又有去過鏞記，比較起來，一般酒樓冲出來都似係水，無茶味的。好茶飲完成身好舒服，呢間喺西營盤？都想去試吓！
大豬：想試靚普洱喎，兩至三位$200，不算貴。現在流行飲綠茶，但綠茶性寒，女士尤其不宜多飲。咪見劉德華飲綠茶你又飲，從前中國人說日本人「倭」，就是說他們飲食習慣太寒了，長不高！
硬膠超人：太遠喎，同埋消費唔平喎，呢個價錢，飲餐茶又得（食飽埋），揼骨都得喎！
相關超連結
http://tea.zjol.com.cn
茶網，國內簡體字版本，每天有茶新聞，更由茶道寫到茶文化、茶與健康，論壇更有甚多好帖子。值得看。
http://www.chinatea.com.tw/
台灣代表，除了有茶資料、討論區外，還有交易市場。
