《蘋果日報》李八方版有個專欄「政壇八達通」，作者單仁。單仁喺二月十三日講「寶哥哥成煲呔政治炸彈」，引述一位「商界朋友」講乜講物，猛插李國寶。左丁山沿用單仁嘅方法，也可引用一啲銀行界朋友嘅睇法，駁斥單仁嘅「商界朋友」無知。
銀行界朋友話，美國證交會與李國寶達成嘅和解，要害唔係賠款八百一十餘萬美元，而係（一）李國寶不能發表任何聲明為自己辯護，即係證交會要李國寶封口封手，只准州官放火，不許李國寶點燈，（二）美國證交會一反常態，冇限制李國寶以後不得出任美國公司董事，根據彭博社所講，以往在同樣內幕交易指控下，與案人通常係唔可以再做任何公司董事嘅。
既然係咁，香港監管當局根本毫無理據嚟阻止李國寶出任本港任何公司董事，中間不涉及甚麼「大細超」疑雲，有疑雲嘅，只係一啲「商界朋友」夠晒MCC。銀行界朋友話，大家當然唔知道單仁之「商界朋友」係乜水，但佢以為呢位「商界朋友」可能係不知情人士，只係「人云亦云」，想當然耳。銀行界消息指出，李國寶由頭到尾都向美國證交會否認洩秘指控，只係有咁啱得咁蹺，在○七年四月十三日早上，寶哥哥與梁啓雄乘坐同一班飛機去上海，寶哥哥嘅夥計代佢check-in，佢自己由VIP通道上飛機，到機場前或上機前冇與梁啓雄碰頭，在機上一個（寶哥哥）坐在機前，亦未與梁講過（證交會文件就話李在機上知會梁啓雄關於杜瓊斯之事）。
一個話有環境證據，一個堅決否認，上到法庭，官司有排打，故此聰明嘅證交會就採取兇悍和解方式，壓寶哥哥簽和解協議。任何一位資深美國律師，都會勸寶哥哥畀錢算數，費事以後七至八年，猛鬼纏身。美國司法制度在此方面是否真正公平、公正，係有疑問嘅，大家睇美國電影、美國劇集例如《LawandOrder》，都知道美國啲檢察官好有傾向同某被告講數㗎啦，一啲又儍又天真嘅人士話：「自己冇錯點解唔打官司還我清白。」此乃入世未深之人講嘅，在社會打滾二、三十年，就知道法律上商業有好多灰色地帶，打官司未必真係有益，可免則免；唔打官司而庭外和解，與個人誠信未必扯上邊，亦唔等於默認，單仁之「商界朋友」毋須上綱上線，左丁山的銀行界朋友如是說。