喺嚟緊3月舉行嘅瑞士日內瓦車展上，Ford將會展出一款家庭小車，佢唔只同份屬姐妹車嘅Mazda2一樣，擁有流線型車體同埋年輕化嘅車廂陳設，最重要係佢喺全球嘅名字將會統一為Fiesta！
記者：鄭達基
引擎配搭選擇多
新款Fiesta嘅造型源自曾經喺去年各大車展現身嘅VerveConcept概念車，所以外觀上流露有未來小車Feel嘅同時，當佢喺08年底正式推出嗰陣，更會同一時間推出3門同5門版本，以迎合唔同車迷嘅口味。車廂陳設方面，主要賣點除咗係空間闊落，可以令前後兩排乘客都可以擁有一個闊落舒適嘅乘車環境外，最重要係設備鋪排亦都傾向以簡潔易用為主，想要有花巧嘢？NoWay！引擎配搭暫時已知有多個選擇，當中包括可輸出115匹馬力嘅1.6公升DuratecTi-VCT引擎、91匹馬力嘅1.4公升Duratec型號，同埋調校成可輸出60同80匹馬力嘅1.25公升Duratec版本等等；有咁嘅設定，咁就算你嘅要求有幾嚴謹，都可以迎合到你啦！
