美國民主黨總統候選人競賽，係黑馬與雌馬之爭，競選之初，美國民主黨內之重要黑人議員一概支持希拉莉克林頓，亦欣賞奧巴馬，認為此子年輕（四十六歲），有大把前途，到咗二○一六年先至五十四歲，可以上馬策騎入白宮嘞，為民主黨延續政權。點知道，呢位年輕人上位如火箭，今年已經策馬直逼希拉莉，這刻逼到雌馬方寸大亂，好容易馬失前蹄，假如希拉莉喺三月四號贏唔到俄亥俄與德克薩斯兩大州嘅話，希拉莉與老公可以在德州上演西部牛仔片最後一幕──策馬入夕陽，從此與政壇拜拜。
陶傑在二月十一日講出頭鳥的故事，指奧巴馬讀大學（洛杉磯西方學院）時已經露頭角。在學生會吸大麻、吹水、煲煙、飲酒、評論時事，係典型學生精英──玩得又讀得，佢可以考入哈佛法學院，證明佢讀書好醒啦。奧巴馬由典型學生精英至成為芝加哥大學法學院教授，至成為參議員，至現今成為熱門總統候選人，逼到政壇元老克林頓夫婦有氣冇碇唞，足以證明一個大學生之成長過程係可以好快速嘅，有料兼進取之人在美國咁開放嘅社會，不會懷才不遇，自怨自艾過一生。
香港就有一類學生威威，後來唔威之人。一啲人在大學時思想前衞，言必沙特尼采或馬列或自由民主（奧巴馬便是如此），在學生會坐在高位，以學生領袖自居，不時吶喊打倒這、打倒那，可惜讀書考試就冇奧巴馬咁掂，及格畢業離校已經算好彩。但離校之後，冇再向前行，還是緬懷自己在學生會之威水史，久唔久就返回大學，向後生一代指指點點，教新一輩大學生如何與不公義、不公平鬥爭。自己事業又如何呀？唔見得點樣醒喎！成日掛住返大學校園指導後輩搞學生會之人，點有時間精力為自己嘅事業爭取上位吖？久而久之，呢類人就會演變成憤世嫉俗，覺得懷才不遇，受建制派打壓，呢個社會毫無公義。奧巴馬係不斷成長之人，離開學校，就走向另一階段，永不回望，不斷自我超越。好彩香港亦有類似的例子，雖然政治不開放，啲昔日學運領袖仍可在商界放異彩。