石修：唔覺已離開
「粵語片時代都同肥姐拍過一兩部戲，之後《EYT》再同佢合作，佢係一個好開心嘅人，佢遇到唔公平嘅事，無論係咪發生喺佢身上，佢都會挺身而出。佢患病期間我有打電話畀佢，佢仲同我講『修仔，我冇事』！所有朋友都會好懷念佢，欣宜失去至親嘅心情有幾難過都唔使講啦，我認為肥姐係冇離開我哋。」
鮑起靜：難得開心果
「肥姐係做大型騷時一齊綵排過，佢對啲綜藝節目好熟悉同有天份，簡直得心應手，呢啲人才係不可多得㗎，佢13歲時就建立咗個肥嘟嘟、開心果嘅形象，學唱歌學跳舞，𠵱家啲女仔13歲都唔知自己做乜，只知減肥。」
吳家樂：佢問候孖仔
「佢好鍾意小朋友，個幾月前都有帶埋個女去探佢，上個月我對孖仔出世，肥姐都有打電話畀我，佢話食咗啲油膩嘢要入院，好遺憾冇帶兩個仔去探佢，呢段時間我會SMS問候欣宜，盡量唔騷擾佢。」
王晶：值得人尊重
「肥姐係個仗義嘅人，好值得人尊重，希望佢走得安心，我同佢都合作過《EYT》，肥姐都好尊重我爸爸王天林，佢係一個好堅強嘅人。」
鄭秀文：佢大情大性
「肥姐意志一直好堅強，希望欣宜振作同堅強，好多人支持佢㗎。我試過喺台慶同肥姐合作，佢份人好大情大性，好有上海人嘅性格，佢一個人喺崗位上堅守咁多年真係唔容易。」
