近排港股日日玩過山車，網上討論區嘅股市眾生相，好睇過電視劇。早排網友抽新股喺《香港討論區》問「如果阿媽輸咗你十皮嘢，你會點？」詳情係：「叫咗佢字都唔識多隻唔好學人炒股，佢偷偷用聯名戶口炒股，過完年先知，我好慘呀！」
至於回應嘅投票選項同截至噚日嘅結果係：當冇事發生佔18.35%、要佢分期還佔9.49%、鬧爆佢佔9.07%、斷絕關係佔6.12%，而同佢賽後檢討分析佔最多，近六成。
先講忤逆嘅先，小小人士話要「斷絕關係」、clear0087：「要佢分期還」、phoebe22：「咁咪喺家用度扣番囉」；忤逆嘅Piranha仲要大條道理：「佢養你幾十年都要錢啦！當還番畀佢，之後脫離關係！」；有啲離譜到好似thank111：「打死佢」、mango167：「斬佢」、熊貓吮吮：「賣阿媽落火坑」…開玩笑都要有限度，咩嘢世界！
似番啲人講嘅就包括拜仁：「當報答佢養育之恩」、daniel47877：「養大你，使佢400萬，10萬算甚麼」；比較有紋路嘅有lamdino：「錢財身外物，畀番十皮佢安慰吓老人家，同佢講話炒股唔啱佢㗎，留番畀阿仔做啦，佢享福得㗎喇！」