將軍澳首都開售已經去到埋牙階段，一班跑新盤嘅經紀，日日走去物業地盤外面食塵，附近就係出入堆填區嘅大貨車必經之路，做地盤就話有口罩戴啫，如果班經紀都罩住個口，容乜易嚇親啲客仔㗎！查實，幫超人賣樓真係唔容易，等佣等得好心痛更加係聞者傷心，聽講今次賣首都，班經紀仲要事前嚟個test，傳聞話發展商想用呢個test嘅結果，嚟決定幾時出佣畀班經紀。吓！咁都得！
老竇學阿仔 舊橋新用
個傳聞係咁嘅，發展商嚟緊一兩日，會喺售樓處度安排間考試房，有心做首都銷售嘅都要入場考試，份試卷會用選擇題形式，考吓佢哋對首都嘅熟悉程度，如果考試結果及格（答中幾多條以上暫時未知），就會準時出佣金（簽單後兩個月內？），如果肥佬，就慢慢等到單刁complete（09年第二季交樓）先出佣啦！聽講每間行會分開時段進行，今次賣首都，每間行隨時有一千幾百人參與，到時售樓處咪變咗考試場？
經紀賣新盤考試呢家嘢唔係長實（001）首創，華華依稀記得某一年盈大（432）行政總裁李智康賣薄扶林貝沙灣嗰陣，都曾經玩過考試，不過當其時並冇將考試結果同出佣金時間表拉上關係。出佣例遲都要合理化，真係冇得唔服超人家族。