恒隆地產（101）主席陳啓宗間唔中就會搬啲愛國論出嚟，噚日佢出席一個論壇嘅時候又發功，話中國發展形勢大好，作為中國人最大嘅機遇，唔係點樣喺大陸搵錢，而係「報國」，即係出盡力為祖國人民謀福祉。佢以恒地（012）主席李兆基同前特首董建華做例子，言下之意可能係叫大家最好有樣學樣。
佢話四叔𠵱家幫緊大陸成千上萬嘅農民轉型，至於董建華就成立咗中美交流基金會，推動中美關係發展；另外，仲有個一早返咗大陸證監會做顧問嘅梁定邦，只係象徵式收取年薪一蚊人民幣，協助推動國內建設監管法治架構……似乎攞咗四叔、董伯伯等過橋做鞋油。
陳啓宗一發功就停唔到落嚟，佢話香港人普遍都冇乜國家觀念，尤其一班三四十歲，甚至係去到五六十歲嘅人，都唔識得報國嘅重要性。
華華會咁樣諗，須知道要喺大陸搵真銀，關係呢家嘢係必需品，點樣先有關係？陳啓宗苦口婆心咁教咗你啦。