港交所（388）將會喺3月5號向廣大股民公佈舊年嘅成績表，唔使華華多講，單睇舊年喺港交所上市嘅公司數目同埋每日成交金額，就知份業績靚仔啦。阿Paul周文耀貴為港交所行政總裁，搏殺咗一年，又到多勞多得嘅收成時候，事關港交所嘅薪酬委員會，每年都就周文耀喺過去一年嘅表現，決定分幾多花紅畀佢，咁阿Paul今年又可以袋幾多呢？
港交所噚日公佈，董事會按照薪酬委員會嘅建議，喺公佈業績同禁止股份買賣期屆滿後，港交所就會拎61.2萬銀出嚟，喺市場掃港交所股份畀阿Paul。嗱，噚日跌市，港交所收160.9蚊，跌咗2.3%，以呢個價計，加埋啲買賣費用，阿Paul可以攞到約3500股，佔港交所已發行股本0.0003%。
派幾多下月揭盅
港交所舊年每日成交額郁吓都過千億，貴為港交所CEO，唔係袋得幾十萬吓嘩！唔通董事會對阿Paul有啲意見?非也，嚟自港交所消息話，董事會好滿意阿Paul表現，報料人仲提醒華華，港交所每年畀阿Paul嘅獎勵除咗股份，仲有現兜兜嘅cash，今年都唔例外，所以噚日公佈嘅只係股份嗰部份，咁現金花紅有幾多?等到下個月就揭盅，大家耐心等等。
不過，報料人話，舊年阿Paul未計購股權，薪金連花紅都袋過千萬，今年估計唔會低過呢個數。睇番06年度本年報，阿Paul年薪734.4萬銀、花紅275.4萬銀，仲有其他福利，淨袋1107.45萬銀。
電郵：mailto:[email protected]