亞視噚日喺尖沙嘴舉行春茗團拜活動，何定鈞率領藝人張文慈、樊亦敏、黎燕珊同劉錫賢等出席。何定鈞透露亞視喺下月3日會有節目大調動，到時只會有一線劇，就係8點至9點半，其餘時間全部以資訊節目為主。何定鈞噚日大派利是同抽獎，啲藝人一擁而上，樊亦敏抽唔到獎，要何定鈞再攞錢出嚟抽獎，何生肯出錢，樊亦敏終於抽到封利是，皆大歡喜。