港股調整一日，又再上過，市底好強，恒指升363點，收24123，已係第4日在250日線（23739）之上，而10日線（23807）亦已重上20日線（23798），市況已有轉穩之勢，短期仍係在23000水平（高低腳底部連結的上升軌）及高位25200反覆上落之局，但個人認為向上突破的機會頗大。
上升正股接近700隻，股仔參差到底後，唔少已開展新上升浪，本周推介的中國礦業（340）和復星國際（656）都有好表現，中礦噚日再高收1.23元，大升0.30元，升幅32.2%，比推介價0.81元已大升51.8%，確係氣勢如虹。另外，中國科技（985）同中策集團（235）亦已發力，分別上升9.7%同12.6%；至於和成國際（651），一個大圓底兜上嚟，亦已蓄銳待發，一升破0.195元，目標就可直指0.27元。和成股價已在所有平均線之上，10日、20日同50日線亦呈強勢排列，股價應會好快出現急升。
成交激增有異動
今日推介宏安集團（1222），呢隻係大跌後仍未開始發力回升嘅股票，噚日股價亦只係收0.124元，小升0.8仙，升幅6.9%，比近期低位0.106元，只係回升咗17%，相比其他如中策由低位0.42元升到0.80元，升幅90%，以及中國科技由0.137元升上0.247元，升幅80%，直情係大落後，短線入市博反彈，分分鐘可以升幾成。
宏安噚日股價小升，但成交就有異動，大增到9.64億股，全部係市場買賣，唔係大手成交上板嗰種，看來有大手斬倉，但亦有大戶大手承接。宏安發行64.5億股，噚日成交已佔咗15%，貨源應已落入強者手中，急升逼近眉睫。
累跌幅度大值博
宏安去年中股價曾高見1.10元，上月底最低落到0.106元，一反彈，即使係最小幅度的0.236，股價都可上返0.34元；反彈0.382，更可見0.485元，現時入市，保守估計今年都可以賺一個開。
宏安已向農產批發業務轉型，估計08年度（3月年結）獲利1.1億元，每股盈利1.7仙，PE只係7.3倍；下年度，每股盈利可上升至2.5仙，就算係10倍PE計，股價已可見0.25元，現價買入，有一個double。