鼠年第一個大型新盤將軍澳首都就快賣得，發展商發放嘅物業資訊越嚟越多，華華終於發現首都有一樣同豪宅有得揮嘅「賣點」，就係管理費勁貴，初步預算係每呎2.15元，即係話最細嘅682呎單位，每個月管理費硬食1466蚊。咁嘅水平除咗係全將軍澳最貴，連其他港鐵站沿線嘅新舊屋苑，都冇佢咁揦脷，好似尖沙嘴港鐵九龍站上蓋嘅擎天半島，二手樓價去到萬幾銀一呎，每呎管理月費都唔使兩蚊，唔怪得知發展商一直話首都一定哄動全城啦！
𠵱家將軍澳普遍私人屋苑嘅管理費，大約每呎1蚊到1.6蚊，同係港鐵上蓋、亦係港鐵自己管理番嘅都會駅同蔚藍灣畔，舊年年尾嘅管理費都只係每呎1.5蚊。
首都份資料仲有好多嘢睇㗎，佢話根據公契，首都嘅業主要支付埋「非港鐵站之公共地方」、「非港鐵站公共設施及設備」等等嘅管理同埋維修費用，而呢啲公共地方同設施設備，會隨住整個日出康城項目發展而逐漸增加，咁即係首都業主嘅管理費「將因此而有所上調」。