近期細價股有明顯升幅，荃灣阿Joe睇好第一視頻（082），認為成交量唔錯，值得追入，噚日股價升35.13%，收報1蚊。
姚：姚浩然 楊：楊慧玲
Joe：呢排細價股有番啲升浪，從事通信傳媒嘅第一視頻，近期成交都ok，股價喺0.9蚊樓下可以玩吓，想博佢短線反彈。
楊：隻股成交多咗（2.2億銀），股價升幅第四位，阿Joe係唔係收到料會炒上去先？
Joe：聽講第一視頻想做中國YouTube，國內互聯網發展快，隻股有潛力。
姚：雖然第一視頻喺廣告方面有收益，但係公司實質盈利仲要畀番長啲時間，但睇短線就無可口非，喺0.9蚊走一轉都無妨嘅。不過呢啲股份要小心定止蝕，當成交量一縮就要識得離場。
楊：隻股今日升咗35.1%，亁升定炒消息？
Joe：有經紀話有啲大戶收緊貨，成交都多，見到有人一球球（100萬股）咁接貨。
姚：有資金去咗啲細價股嗰度，專炒某幾隻，有啲投資者跟風，隻股可以短炒。
中國七星（245）
細價股旺搭順風車
Ben：今日推介中國七星（245）。
楊：佢今日上咗20大升幅喎！𠵱排細價股旺番啲。
Ben：係呀，𠵱排細價股當炒，所以想搭轉順風車，見股價上番50天線，走勢唔錯，你哋睇隻股仲有冇得玩？
楊：舊年有朋友叫我入，當時最高去過個幾，𠵱家跌到得返兩毫子左右。
姚：搭順風車可考慮，如果股價已經跌定的話，可以博佢上番去0.4蚊左右。巿況唔好，止賺價唔可以睇太高，可以趁大價股疲弱時玩吓。記住只係跟風炒，要定好止蝕，同埋要識跟風落車。
--北角Ben建議--
建議買入價：0.236元 目標價：0.3元
止蝕價：0.18元 時期：三個月
中國海外（688）
逢跌反彈伺機吸納
周小姐：想問隻中國海外（688），有幾次佢跌完都會即刻反彈，我想等佢再跌嗰陣再吸納。
楊：股價幾次喺15蚊邊緣上落，相信嚟緊可以衝破現價。
姚：預期大陸樓農曆年銷售唔錯，中國海外都會受惠。前排內房股跌幅大，之前已經反彈咗。中國海外土儲數量適中，資金充裕，所以定喺14蚊入市都啱嘅。不過佢股價好多時都係即日上落，就算巿況好都係16、17蚊徘徊。我覺得你可以再忍吓手到12蚊嘅好位先買。
楊：巿盈率成45倍，會唔會太貴？
姚：雖然佢現價較貴，但預期佢中期盈利會上升六成，佢係行業龍頭同管理好，所以現價都算合理。
--將軍澳周小姐--
建議買入價：14元 目標價：18元
止蝕價：13.7元 時期：半年
洛陽鉬業（3993）
落後大市再次推介
關公：今日再推介洛陽鉬業（3993），佢落後大巿。
楊：現價11蚊比高位20蚊仲有近一倍距離，呢隻股已經跌殘咗，睇番現價都值得博！
姚：洛鉬現價屬於幾吸引嘅水平。最近資源概念當炒，好似銅、鋼嘅價格都升咗啦，買資源概念嘅話洛鉬可以再反彈。如果你11蚊入貨，上升空間唔大，反而可以等佢落番10蚊先入貨。
楊：洛鉬次次跌完都會反彈，佢最近仲採埋金，連大摩都睇好。呢排金價係咁升，對洛鉬有利。咁你睇唔睇好金價？
關公：睇好㗎！不過因為巿況，唔敢set太高，14蚊左右就會走人。
--大埔關公建議--
建議買入價：11元 目標價：14元
止蝕價：9.5元 時期：三個月