一個學期剛剛開始，又要為下一個學期驚定先，我諗𠵱家小六學生嘅家長，都係抱呢種心情，因為又要為仔女着手準備升中面試。與其心驚驚唔知會問乜，不如就等閱盡考生錯處同out學生無數嘅名校考官TonySir，幫你分析面試時最常見問題，幫你見招拆招，令學生淡淡定過難關。
記者：劉昱蘭
攝影：梁細權、陳盛臣
Models：芷蔚、Sonia、Jef
面試3部曲
TonySir話現在的考核模式唔會太千奇百怪，即場看圖作文唔多，最多用普通話同你傾偈，常見嘅離不開3部曲︰單對單面談、小組討論和閱讀理解，不過就算考中文中學，都有可能全英文對答。
騎呢問題有發揮
聽TonySir話，有啲考官會好騎呢咁拎個電話、八達通、或者陳冠希個樣出嚟，叫你講吓關於佢哋嘅嘢。唔使驚，其實呢啲自由發揮題仲好，講乜都得，例如講跌電話嘅經歷、憎唔憎陳冠希等，最少一定唔會離題。
Part1 單獨面談要鎮定
面談都係想評核學生的英文措辭及程度，所以問題一般都唔太深，以下係常見8問。
1）點解你會想讀呢間學校？
最好答中面試學校嘅強項，如睇中學校嘅語言、體育或音樂水平等，有親戚朋友讀緊仲好，話見佢哋讀得好開心，所以好想同佢哋做校友。
2）你鍾唔鍾意睇書？最鍾意邊個作者？
鍾意讀書嘅就講一兩本書名同作者名，再加少少內容同鍾意嘅原因。唔鍾意嘅就唔好只得一句"No,Idon'tlikereading."，可以講吓會從報紙、雜誌或益智網頁等吸收資訊。
3）你有乜興趣？
如小朋友動靜皆宜，便可講一靜一動的興趣，給人多元化感覺。"Ilikesleepingandeating."呢啲答案就唔係咁得體喇。
4）今日嚟面試途中有冇特別嘢發生？
呢條係考講故事能力，就算無事發生都可直講，如可答因路上不停諗面試事宜，所以冇留意其他嘢。
5）你最鍾意邊科？
邊科都冇所謂，最緊要講到原因就OK。
近期重要港聞
6）近期你有冇留意香港嘅特別新聞？
除咗講番件事嘅背景，加兩句自己點睇就最好，顯得小朋友有主見夠醒目。
-中國雪災
-陳冠希事件
-昂坪360纜車意外
-北京奧運及香港馬術比賽
7）你有冇去過旅行？最鍾意邊個國家？
冇出過國嘅可講香港某個地方，記住，答到個地方和原因就得喇。
8）喺學校裏你最喜歡邊個老師？
又係邊個都冇所謂，因為考官只係想考吓你識唔識用英文，講自己最貼身嘅事同睇法。
Part2 小組討論爭講第一
通常3-4人一組，討論嘅問題都好general，如學生應否帶電話回校，或者你會點樣為學校搞籌款活動……肯用腦嘅就一定諗到。但討論同單對單面談唔同，係要同其他人有交流，所以唔可以自說自話，最好講句"Iagreewithyou"或"Icanseeyourpoint,butIthinkit'sbetterto......"，咁先係討論。最好就係做第一個發言人，咁就唔怕俾人講晒重點喇。
Part3 閱讀理解要識拼音
面試時會有一篇大約200字嘅文章讓你朗讀，有深字唔識讀就大膽試吓拼音讀；太深拼唔到嘅可問老師，從中表達你認真嘅求知慾，但最多問兩個，唔係會扣晒印象分。此外，仲要了解文章內容，因為老師好有可能問followupquestions，考你理解能力。教署規定唔可以筆試，所以會用oral考埋comprehension，甚至maths。
10項DOs&DON'Ts
TonySir幫麗瑩同Gill模擬面試情況，好快就從佢哋身上搵到學生面試時常犯嘅錯誤，讓學生家長留意。
1.入房前請敲門：如果你敲門，問多句"MayIsitdown?"，印象分贏晒。
2.別死背答案：要有備而戰，但唔可以畀人有背稿感覺，在適當處都要作停頓。
3.望眉心當眼神接觸：如果真係好怕直望考官，可以轉移視線望眉心或鼻尖。
4.保持笑容：唔使過份，只要畀人friendly嘅感覺就得。
5.坐姿要挺直：坐得要有台型，似蝦米咁只會顯得個人無自信又無生氣。
6.適當聲浪：通常學生說話偏細聲，記得唔識答都要大聲，咁先顯得有自信。
7.雙手擺位：交叠冇問題，亦可平放大腿上。
8.唔好太casual：避免髮型太潮，唔好着波鞋牛仔褲，皮鞋白襪最穩陣，女仔素色及膝裙，男仔恤衫西褲實無死。
9.閱讀有姿勢：咪頭耷耷或托下巴，最好坐直拎起張紙睇文章。
10.紮起頭髮：女仔頭髮太長就紮起佢，男仔額前頭髮唔好垂過眼。
升中面試預備班
坊間亦有短期課程教你如何應付面試，集中訓練技巧、發音同自信，訓練有素自然建立自信。
日期︰2月23日開始，分2堂或4堂進行，共4小時
學費︰$980（4人一組）每小時$350（私人教授）
語言︰英語
導師︰TonySir
地址︰北角城市花園城市中心商場地庫全層（QQClub優兒學會）電話︰22346616
楊師傅教你旺文昌
除個人努力及實力，運氣都好重要，楊天命師傅話今年文昌位在東北方，喺嗰度溫書就夠旺；仲教埋你喺屋企點擺文昌，催旺小朋友嘅讀書運。
