張玉珊數年前邀請沈殿霞的愛女鄭欣宜擔任其修身堂的代言人後，便與肥姐母女成為好朋友，昨日她獲悉肥姐病逝噩耗後，即以手機短訊問候欣宜，希望她能節哀。
代女試減肥餐
目前身在上海的張玉珊在電話中說：「我知道欣宜好堅強，為咗媽咪呢個病，欣宜都撐咗好耐，佢兩母女感情真係好好，記得當年肥姐打畀我，佢話欣宜想嚟我公司減肥，但佢唔放心，堅持要等自己試過冇問題，先肯俾個女嚟試。」
張玉珊認為肥姐是一位偉大母親，為了替女兒先試驗收身效果，一向愛吃各種美食的她，竟然甘願吃無鹽無味的減肥餐，張玉珊說：「當日肥姐話減肥餐太淡，好難食，我就同佢講頂唔順就唔好食，但佢為咗個女都頂硬上，你話呢啲媽咪係咪好偉大呀？」
採訪：林妃