數碼電視開播，只要處於接收範圍之內，相信唔少人都心思思想睇高清，不過若然訊號未射到嚟，仍然有機會親身享用數碼電視高質素畫面。皆因數碼電視並非只限家中欣賞，現時已發展到可以周街睇！只要你有部筆記簿電腦，再加埋SPEED新出的HD-B100數碼電視接收器，就隨時隨地都可以睇高清台！
記者：許福合
攝影：伍慶泉
Model：Fion
USB手指外形
SPEEDHD-B100數碼電視接收器簡單易玩，外形十足USB手指，不過只要配合電腦操作，就立即可讓用家接收及欣賞到數碼電視畫面。接駁方面好簡單，只要將HD-B100插入電腦USB介面即可。留意隨產品附送兩種天線，一種係有線可拉長座枱天線，另一種較簡單，適合移動中使用的短小天線。接收能力以前者較強，可因應環境選擇位置擺放。若處於可接收數碼電視大廈，仲可以用轉換頭接駁大廈天線，接收效果更佳。
慈雲山接收最好
HD-B100之所以咁小巧，全因大部份功能都由筆記簿處理，建議以IntelCore2Duo以上機種使用，效能低的系統可能令畫面延遲。而且數碼電視接收需要進行解碼，電腦亦要預先安裝附送的《BlazeDTV》軟件才可看到畫面。筆者於慈雲山作實地測試，軟件顯示訊號收爆，打開軟件就好似開電視一樣，幾乎立即就有畫面睇。新裝軟件經過掃描，可成功收齊13條高清及標清頻道，轉換頻道需時約2、3秒，相當唔錯。而且畫面質素達1080i水準，一般筆記簿電腦17吋以下屏幕，已經夠晒用。不過去到多高樓及室內環境，訊號轉弱，可見比較適合戶外空曠環境使用。
變身錄影機
《BlazeDTV》軟件除咗顯示電視畫面，啓動軟件時更會立即掃描所有頻道並建立預覽圖示，用家一眼就可以知道有咩好睇！而HD-B100配合電腦操作更可以提供錄影機功能，配合EPG錄影操作更係非常簡單，除咗即時錄影外，更可以從EPG菜單中選取想欣賞的節目錄影，比真正錄影機還要方便！而重播質素亦同樣保留高清級畫面，不過要留意長時間錄影需要極大硬碟容量。《BlazeDTV》還支援5.1音效，而中文顯示亦完全無問題，未有亂碼情況出現。
Profile
調解器：第三代處理晶片
電視制式：DMB-T/H數碼制式
支援解像度：1080i/720p/576p/480i
錄影檔案格式：H.264、MPEG2
查詢：SPEED（29581113）/FINEUP（23611295）
畫面實試
於室外欣賞流暢度不俗，有數碼電視特色，細緻銳利，有層次感，畫面水準明顯在DVD之上。
