林建岳旗下嘅豐德麗集團前晚喺尖沙嘴洲際酒店舉行春茗，舒淇、楊千嬅、杜琪峯同黃曉明等都有出席。陳冠希未返港，黎明就喺北京拍《梅蘭芳》，劉德華放假都唔喺香港。現場公佈《集結號》同埋《投名狀》嘅總票房達5億元，林建岳鬼咁開心。
阿杜鬧千嬅八婆
黎明冇到，舒淇出席完柏林影展，台灣都未返就嚟撐場，佢飲酒飲到醉醉哋，同楊千嬅俾人拉上台抽獎，仲大喝杜琪峯上台，叫阿杜捐2,000蚊予內地雪災災民，阿杜話：「2萬都得。」後來阿杜抽獎，千嬅迫佢讀出佢手上號碼，阿杜話：「啲人叫人造馬，呢個世界邊有公義？」舒淇幫口話：「公義等差佬去理，你唔好理。」於是阿杜讀出千嬅個號碼話：「439呀，邊個死八婆㗎？」千嬅好尷尬話：「係老闆林生㗎。」
舒淇又叫老闆林建岳捐十萬畀雪災災民，林建岳沒好氣話：「我已經捐咗百幾萬畀雪災，要捐就捐你兩個出去籌款，舒淇同楊千嬅今晚，邊個出價？」全場鴉雀無聲，千嬅例牌喪笑，舒淇轉話題要幫千嬅慶祝生日，仲唱生日歌，原來前晚係千嬅舊曆生日，林建岳話：「啲雜誌成日話我啲仔女唔妥，大家睇吓佢哋幾融洽。」