被喻為開心果的肥姐沈殿霞，有不少精采影像永留於世，尤其肥姐與盧大偉跳芭蕾舞，以及盧海鵬扮欣宜令肥姐笑到失禁等片段，至今仍為觀眾津津樂道。肥姐昨日病逝，盧海鵬認為是香港的損失，盧大偉則說：「我覺得𠵱家好似同佢跳緊舞咁，希望大家都會記得佢開心嘅一面。」
曾帶給香港觀眾無限歡樂的肥姐沈殿霞，昨早於瑪麗醫院病逝，身為數十年拍檔的盧海鵬和盧大偉莫不感到痛心。當年在《歡樂今宵》中，盧大偉不但經常與肥姐拍檔做司儀，而且二人早年跳芭蕾舞的表演，更為保良局籌款騷寫下經典一頁。
盧大偉昨在電話中說：「我身為演藝人，如果有佢咁嘅成就我就會好滿足，我知佢心裏面其實想再創事業高峯，雖然佢因為健康問題做唔到，但佢今日嘅成就大家係有目共睹，好多人窮一生嘅時間都做唔到佢咁。」
盼低調幫助欣宜
「佢嘅成就唔係一朝一夕，都係靠多年努力得番嚟，唔似𠵱家啲年輕人好輕易就得到機會，所以唔識得珍惜。我同阿肥合作最深刻都係跳芭蕾舞，利用大家外形產生咗一個好有趣嘅效果，到今日觀眾都仲記得，我覺得𠵱家好似同佢跳緊舞咁，希望大家都會記得佢開心嘅一面。」
盧大偉續說：「肥姐嘅事（身後事）要唔要人幫手，我覺得最緊要出心，我相信佢經濟上好過好多藝人。至於欣宜係咪要提攜佢，我覺得最緊要畀佢自立嘅條件，因為欣宜壓力好大，外面好多人以為欣宜要靠人輔助，我哋身為世叔伯，要好低調咁幫佢，令佢自立。其實喺人道立場，見阿肥咁辛苦，我都會覺得……不如唔好咁辛苦好過。」
肥姐當年在無綫台慶節目有不少經典片段，如1996年盧海鵬扮欣宜，一度令肥姐笑到失禁，昨日盧海鵬接受訪問時，也表示對此幕最為難忘，他說：「對香港係一個絕大損失，佢係人才，冇人可以比得上。我感觸良多，最難忘係我當年扮欣宜搞到佢（肥姐）失禁。」
阿炳憶同做老闆
另外，盧大偉及譚炳文昨晚亮無綫悼念肥姐特輯，盧大偉說：「大家唔使咁傷心，佢嘅成就大家都替佢開心，阿肥以前鬧人遲到，有人覺得佢好霸道，但其實佢係一個好榜樣，𠵱家年輕人應學習，有機會我都會上去，到時再同佢跳芭蕾。」
譚炳文則說：「對上一次見佢係5、6個星期前，當日同佢飲茶，個人瘦晒，但都食好多嘢，可能個病關係，所以個人會有啲𤷪𤺧。我同佢識咗40幾年，以前一齊登台又一齊夾錢做老闆拍電影《你係得嘅》，佢自己執導埋。我覺得佢離開係一個解脫。」
採訪：林妃 攝影：葉君海
家燕：可惜探唔到
薛家燕與肥姐相識多年，兩人感情儼如姊妹，家燕昨身在美國，得悉肥姐病逝後接受新城及電視台訪問，她說：「見唔到佢最後一面好唔舒服，好難過，本來我去美國之前想去探佢，不過佢啱啱入咗醫院，我探唔到佢，我有傳短訊畀佢，好多人關心佢，不過都知情況唔好，但係肥姐好堅強，佢嘅離開係電視電影界一大損失。」
家燕續說：「我希望佢嘅家人節哀順變，尤其係欣宜之前外婆走咗，𠵱家媽咪又走咗，真係一個大打擊，肥姐最錫呢個女，𠵱家佢走咗係一個解決，佢嘅病令佢捱咗一段日子，佢唯一唔放心嘅相信就係欣宜。」
夏雨：佢好有義氣
夏雨跟肥姐其實早於無綫1967年開台之前已經合作，二人於60年代為麗的映聲（亞視前身）時期合作演出話劇《拉郎配》，之後一同轉投無綫主持《歡樂今宵》，相交近50年。
肥姐離世，夏雨深感可惜，他昨在電話中說：「佢係一個好江湖義氣嘅人，有事搵佢幫手一定義不容辭。佢最放唔低係欣宜，嗰陣時佢病得好厲害，欣宜喺美國拉斯維加斯做騷，佢都仲要飛過去睇佢，我哋身為世叔伯，梗係會幫手睇住欣宜啦。今次唔止失去一個好朋友，而且更係香港一個損失，希望佢去得安詳。」
林建明：有心理準備
好友之一的林建明說：「肥姐嘅身體機能麻麻，不過佢意志力好強。佢今次入院，我有心理準備佢出唔返嚟，佢過年後嘅情況麻麻哋，我本來好想去見佢，不過佢已經昏迷，去見佢都未必知，一直以SMS聯絡。佢一生對演藝界好大貢獻，專業態度精神好值得後輩學習，一般人以為肥係缺點，但佢就將缺點化為優點，開心果形象係冇人可以取代。」
