蓮花，出於污泥而不染，故有花中君子之稱，而以蓮花命名嘅汽車同樣有此特性。英國Lotus無視其他超級跑車點變，始終堅守原則，以機械化高性能棍波超跑形象贏得一班忠實擁躉，呢班「粉絲」仲自發開Club，講到明「Beforewarnedthough,Nomoronsallowed」，即係話就算志趣相投，但若然係Moron一個都謝絕入會，呢份豪氣唔係人人有，加上一貫堅持態度，問你服未！
記者：梁美甜
攝影：林栢鈞
部份照片提供：HubertLi（ClubMember）
等足7年至註冊
喺00年，一班熱愛Lotus嘅車迷為咗同車迷分享自己嘅興趣而設立網頁，繼而喺07年7月註冊成立TheLotusClubHongKong（簡稱LCHK），何以等咁耐至註冊呢？副會長Tom話：「我哋會定時定候舉辦活動，但每次到珠海舉辦TrackDay嗰陣，都會因為車會未註冊而困難重重，所以咪正式走去登記註冊囉！」
LCHK就喺1月24日慶祝正式註冊，當日一班Fans為慶祝呢個咁有紀念性嘅日子就搞咗個Party，仲講到明要「人車到」，大家可以想像呢日有幾多「蓮花」蒲頭呢？
情有獨鍾機械「蓮花」
LCHK正式註冊成立，絕對有賴熱衷又熱誠嘅Lotus迷，佢哋嚟自不同行業不同階層，何以會對「蓮花」情有獨鍾呢？
揸車經驗10年嘅Simon，佢由最初只係瀏覽Lotus網頁，到今日成為LCHK會員足有3年光景，「未有Elise前已經鍾意Lotus，於是成日上網睇吓有關佢哋嘅資料；嗰時有朋友本身擁有Lotus，有一次佢帶我一齊去佢哋嘅TrackDay，發覺成班人都非常Friendly，唔似得一啲Club咁有好強嘅階段觀念，試過有人發生意外，大家即時提供協助，呢種無私奉獻唔係個個會或者人可以做得到！」問到Lotus吸引之處，Simon諗都唔使諗：「血統、操控性同夠獨特性！」又係嘅，Lotus絕對係一部講求技術操控嘅高性能個性跑車嚟！
身為副會長、又係活動搞手之一嘅Tom亦有同感，「Lotus嘅車好機械化，無ABS、無好舒服嘅皮座，加上只有手波，要掌握操控技術同勇於挑戰先可以駕馭得到。簡單啲講，Lotus唔係為每一個人而設，而係為一班好鍾意享受CarControl嘅人而設。」
官方網頁： http://www.lotusclubhk.org
赤子童心成熟態度
LCHK現時大約有500名來自世界各地嘅會員，淨係香港嘅活躍會員都約70名，單係呢個Party就已經有50多名會員出席，可見會員對LCHK嘅投入同支持度，同時足證佢哋有幾Friend啦！
如果你都想加入呢個大家庭，首先係要擁有「童心」，因為佢哋講到明只歡迎所有擁有「Refusetogrowup」精神嘅人。我就話佢哋絕對「Mature」，如果唔係又點可以遊戲時擁有童心，同時又要認真面對、享受生活，又對朋友擁有一顆無私嘅心喎！或者人如其車，生於奢靡嘅色慾都市依然擁有一顆清心，名副其實嘅「蓮花」吧？
同場加映
劉華為新代理揭幕
RichburgLotus由06年正式接任Lotus香港代理，揭幕當日仲請嚟劉德華任嘉賓，同時展出兩款新車包括EliseR同ExigeS，當日佢更大讚兩款車夠型仔！但可惜工作太忙，無緣喺香港享受開篷跑車樂趣咁話。
鐵金剛×Esprit勇破海底城
既然Lotus出自英國名門，出現喺英國大熱電影入面亦屬必然；就好似喺電影《鐵金剛勇破海底城》入面咁，以水陸兩用車形態出現嘅EspritS1，至今仍叫車迷同影迷留下深刻印象。