提到意大利，你會聯想到甚麼？歷史建築？名牌時裝？意大利粉？還是歌劇？有一半意大利血統的孖仔組合Soler，曾於當地留學數年，名牌見過不少，名勝古蹟遊歷過無數次，其實來到意大利還有一個新玩法，就是復歸原始……從「手作仔」開始。 撰文：吳佩思
也許是遺傳因子作祟，Soler的父親是雕塑師，所以在意大利留學期間，Julio也靠手藝賺錢過活，其中一項工作就是髹面具，也是今次意大利之旅其中一站。
Dino遭蠱惑馬噬
Julio說﹕「嗰陣我想搵嘢做，老闆就畀面具我返屋企畫，錢唔多，多勞多得。其實意大利好多手工藝製作，呢間舖頭最大特色係老闆會幫客人度身訂做個模嚟做面具，而且全部用紙同膠水做，然後上色，所以質地好輕，唔知情仲以為係金屬製，好多遊客都以為啲圖案係印上去。」
Julio是油畫高手，故此當時老闆大多要求他在面具上畫風景，最滿意之作是模仿橄欖木紋繪圖，他說：「嗰個面具都畫咗成個通宵，因為佢最難嘅地方係凹凸不平。」
看完精美的面具，不如轉個角度歸園田居參觀農莊，Julio表示：「呢個農莊位於Tuscany其中一個城市，意大利好流行開放農場俾遊客參觀，或者付費住一個月，試吓自己耕田、養馬牧羊，好多德國人都嚟，我同Dino都試過。有隻馬好蠱惑㗎，農場主人話佢好乖唔會扭計，點知話口未完Dino就俾佢咬大髀！」Soler兩兄弟還試過親手做羊奶芝士：「發酵之前嘅羊奶芝士好似一個毛冷，摸上去毛茸茸，好似貓毛咁。至於食法，最好係就咁切嚟食配紅酒，或者撈意大利粉。」
野豬吐幣好運來
走出鄉村，重回大城市，來到佛羅倫斯市中心廣場，有一頭非常有趣的青銅野豬雕像，傳說只要將銀幣放入其口中，待其吐出來時，如果銀幣跌在特別設計的凹槽內，便會帶來好運。如果你不喜歡不會動的豬，可以選擇到Siena這個古老城市感受一下賽馬的刺激。Julio說：「每年夏天喺呢個廣場都有賽事，成個比賽冇任何規則，點跑都得，馬匹平時都冇經過特別訓練，全部都係比賽嗰陣先落場跑，好難馴服，所以每年都有唔少參賽者同遊客受傷。」
話你知：捐窿搵食
很多人到意大利，就是愛她的歷史建築和名牌商店，其實還有另一種玩法，就是迷路。Julio說：「歐洲啲路四通八達，其實唔會迷路，所以你可以盡情蕩失路，一路行一路睇，盡量行多啲橫街小巷，你會發現到好多意想不到嘅嘢，例如手工藝品、小食等，仲會搵到好多好靚嘅皮具製品，全部都係喺名店搵唔到㗎！我推介大家去吓啲細街搵啲餐廳仔試吓，會食到好多正嘢，好似麵包糠、野兔肉意大利粉咁，仲有野豬食。」
話你知：小心扒手
意大利小偷猖獗，Julio提醒大家要慎防扒手，他說：「最緊要小心嗰啲着裙嘅吉卜賽女人，通常佢哋都係幾個人一齊搵食，有時仲會帶埋小朋友。佢哋大部份都係攞住張報紙扮向途人問路，你又聽唔明佢講乜，自然會分散注意力，同行嘅小朋友就會趁機偷走你嘅財物。我親眼見過好多次，所以提醒大家寧願俾人話你冇禮貌，總之遇到有人問路，而你又聽唔明佢講乜嘢嘅時候，最好即刻走。」