碧桂園（2007）成功發行38.99億元可換股債券，噚日股價逆市彈升11.4%，收報7.48蚊，大埔關公認為𠵱隻股之前調整夠深，值得追入。
孫：孫柏文碩：黃敏碩
關公：碧桂園噚日成功發行可換股債券，加上佢個股價由高位回落超過50%，我覺得現價買得過。
碩：跌穿8蚊之後𠵱家已經補番個裂口，但係單日升幅唔可以作準。成功發債，碧桂園手頭現金有25億，外界又睇好佢嘅銷售額，集資可以降低番借貸成本，所以股價今日被推高，但要小心宏調。好多內房股一早已經升晒，佢𠵱家只係食尾糊，所以中線並唔睇好。
關：之前股價跌因為圈地問題同埋跟大巿回落，股價已經由高位回落一半，開始睇到支持，可以睇9蚊。
碩：呢隻股「宜短不宜長」，碧桂園係民營，如果跟唔足國策方向會較為輸蝕，𠵱家仲未知國家政策對佢有幾大影響，而且升都要巿況配合。現價喺100天線樓下，比較弱，8蚊有一定阻力，如果睇9蚊，就要等下一浪升巿先可以見到。
孫：9蚊會見頂，因為政策因素太大。
江蘇寧滬（177）
走勢強升得快
黃小姐：今日買咗江蘇寧滬(177)，見佢走勢唔錯，所以入貨。
孫：你睇幾多錢？
黃：8.5蚊，呢隻股一升會升得好快，所以買。
碩：公路股中佢算唔錯，巿盈率唔高，派息比率有81%，唔睇派息睇防守嘅話都可以考慮。未來要留意車流量同競爭力，中線可以考慮，但去唔去到9蚊就要睇巿況。
孫：今期《經濟學人》有個專題話中國好多公路，本來預計十年先會飽和，點知去到第七、八年已經飽和，好似當年紅隧咁，以為要廿年先回本，事實三年就已經回本，好多大陸公路股都有呢個概念，呢隻股長遠都ok。
--屯門黃小姐建議--
建議買入價：7.7元 目標價：8.5元
止蝕價：7元 時期：一星期
首長國際（697）
炒購鐵礦消息
李先生：之前我一路有睇鋼鐵股，上星期推介過鞍鋼（347），今日推介隻首長國際（697），佢收購咗個澳洲鐵礦，股價之前一直都喺3蚊樓上徘徊，見佢跌落嚟，所以喺2蚊嗰時入咗。
碩：都係炒消息為主，論產品同競爭力，同你上次推介嘅鞍鋼有段距離。追落後短炒唔反對，不過鞍鋼始終係龍頭股，作為策略性持有比較好。
李：咁可唔可以睇2.5蚊？
孫：都可以，不過喺2.5至2.7蚊要識落車。
李：點解啲公司咁鍾意喺澳洲買礦？
孫：好似踢波嗰時人釘人戰術咁，可以分散俾人收購嘅風險，加上美國排華，响澳洲收購會易啲。
--旺角李先生個案--
買入價：2元 目標價：2.5元
止蝕價：1.9元 時期：半年
中交建（1800）
具中鐵建影子概念
張先生：仲有一兩個禮拜中鐵建就招股上市，今次推介中交建（1800），趁佢之前跌咁多，炒佢有影子概念。
孫：根據《經濟學人》所講，遲啲可能有條橋由福州起去台北，唔知中交建會唔會中標！
碩：雖然近期以中鐵（390）股價較為硬淨，不過中交建都算係抗跌力比較強，如果以雪災後基建概念嚟睇，佢業務廣泛程度確係勝人一籌。
張：博炒上去23蚊得唔得？
碩：可以分兩注做，20蚊樓下可以入一注，如果佢再跌穿250平均線可以再撈一注，如果考慮長揸都有條件上到23蚊。
--觀塘張先生建議--
建議買入價：20元 目標價：23元
止蝕價：- 時期：一個月
吉利汽車（175）
睇完劇集想入貨
陳小姐：我睇完《歲月風雲》之後，特別留意吉利汽車（175）呢隻股，如果9毫子入，1.2蚊走得唔得？
碩：我對呢隻股睇法中性，佢最近話會增加廠房，1月銷量又上升，都利好吉利。如果睇品牌發展，我較睇好東風集團（489），因為佢哋有外資股東，定價能力較強。不過睇吉利𠵱家嘅估值，可以考慮炒波幅。
陳：大陸越嚟越多中產買車，所以睇好吉利！
孫：汽車業最大問題係生產量可以好大，如果有惡性競爭，會對佢不利。如果你睇好多人買車，可以留意吓石油股，因為多人揸車就等於多人要用油。
--沙田陳小姐建議--
建議買入價：0.9元 目標價：1.2元
止蝕價：0.75元 時期：半年
